ലൂസിഫറിനു ശേഷം പൃഥ്വിരാജ് സംവിധാനം ചെയ്യുന്ന, മോഹന്‍ലാല്‍ നായകനാകുന്ന ചിത്രമാണ് ബ്രോ ഡാഡി. സിനിമയുടെ ചിത്രീകരണം നടന്നുകൊണ്ടിരിക്കുകയാണ്.
മോഹൻലാൽ കാമറയ്ക്ക് മുന്നിലെത്തിയാല്‍ പിന്നെ സാര്‍ എന്നാണ് തന്നെ വിളിക്കുന്നതെന്നു പൃഥ്വിരാജ് പറയുന്നു. പൃഥ്വിയുടെ വാക്കുകള്‍ ഇങ്ങനെ.
ഞങ്ങള്‍ വെറും സുഹൃത്തുക്കള്‍ മാത്രമല്ല. അദ്ദേഹം എനിക്ക് ഒരു സഹോദരനും ഉപദേശകനുമാണ്. ഞങ്ങള്‍ ഒരേ ബില്‍ഡിംഗിലാണ് താമസിക്കുന്നത്, ഇടയ്ക്കിടയ്ക്ക് കാണും.
ഒരുമിച്ച് ചായ കുടിക്കുകയും തമാശ പറയുകയും ചെയ്യും.അദ്ദേഹം എന്നെ മോനെ എന്നാണ് വിളിക്കുന്നത്, എന്നുപറഞ്ഞാല്‍ മകന്‍. ഷോട്ട് റെഡി ആയെന്ന് അസിസ്റ്റന്‍റ് പോയി പറയുമ്പോള്‍, അദ്ദേഹം വരും, കാമറയ്ക്ക് മുന്നില്‍ നില്‍ക്കും, പെട്ടെന്ന് എന്നെ സര്‍ എന്ന് വിളിക്കുമെന്നും പൃഥ്വിരാജ് പറയുന്നു.
ഞാന്‍ അപ്പോള്‍ തന്നെ അദ്ദേഹത്തെ തിരുത്താന്‍ പോകും. പക്ഷേ അദ്ദേഹം എന്നെ സാര്‍ എന്നു തന്നെ അഭിസംബോധന ചെയ്യും. ചിലപ്പോള്‍ 20 ടേക്ക് എടുത്താലും അദ്ദേഹത്തിന് ഒരു പ്രശ്നവുമില്ല.
ഷൂട്ട് എല്ലാം കഴിഞ്ഞ് വീണ്ടും എന്നെ മോനേ എന്ന് വിളിക്കും. അദ്ദേഹം വളരെ നല്ലവനാണ്- പൃഥ്വിരാജ് പറയുന്നു. ഫിലിം കാമ്പയിന് നല്‍കിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
-പിജി
