തിരുവനന്തപുരം: സംസ്ഥാനത്ത് നാലാഴ്ച അതീവ ജാഗ്രത വേണമെന്ന് ആരോഗ്യമന്ത്രി വീണാ ജോര്‍ജ്.
സ്ഥിതി വിലയിരുത്താന്‍ ആരോഗ്യവകുപ്പിന്‍റെ അടിയന്തരയോഗം ഇന്നു രാവിലെ വിളിച്ചിട്ടുണ്ട്. കോവിഡ് കാലത്താണ് ഓണം എത്തിയത്.
എല്ലാക്കാലത്തും അടച്ചിടൽ സാധിക്കില്ല. ജീവനും ജീവിതോപാധിയും ഒരുപോലെ സംരക്ഷിക്കാനുള്ള പരിശ്രമത്തിലാണ് സര്‍ക്കാര്‍.
അതിനാലാണ് കടകള്‍ക്കും കച്ചവട സ്ഥാപനങ്ങള്‍ക്കുമുള്ള നിയന്ത്രണങ്ങള്‍ കുറച്ചത്.
കോവിഡ് മാനദണ്ഡങ്ങള്‍ കൃത്യമായി പാലിക്കണമെന്ന് എല്ലാവര്‍ക്കും നിര്‍ദേശം നല്‍കിയിരുന്നു.
കുറേപ്പേര്‍ അതു പാലിക്കുന്നതായി കണ്ടു. എന്നാല്‍, പലയിടങ്ങളിലും ആള്‍ത്തിരക്കുണ്ടാകുന്ന സാഹചര്യമുണ്ടായി.
അതീവ വ്യാപനശേഷിയുള്ള ഡെല്‍റ്റ വൈറസിന്‍റെ ഭീഷണിയിലാണ് പല പ്രദേശങ്ങളും. മൂന്നാം തരംഗത്തിന്‍റെ ഭീഷണിയുമുണ്ട്.
അതിനാല്‍ ഓണാവധി കഴിഞ്ഞ് സ്ഥാപനങ്ങളും ഓഫീസുകളും തുറക്കുമ്പോള്‍ എല്ലാവരും അതീവ ജാഗ്രത പാലിക്കണമെന്ന് മന്ത്രി നിർദേശിച്ചു.
മൂന്നാം തരംഗം മുന്നിൽക്കണ്ട് താലൂക്ക് തലം മുതലുള്ള ആശുപത്രികളില്‍ കൂടുതൽ ഓക്സിജന്‍ കിടക്കകളും ഐസിയുവും സജ്ജമാക്കുകയാണ്.
വെന്‍റിലേറ്ററുകളുടെ എണ്ണവും വര്‍ധിപ്പിച്ചു. ജില്ലാ ജനറല്‍ ആശുപത്രികളിലെ ഐസിയുകളെ മെഡിക്കല്‍ കോളജുകളുമായി ഓണ്‍ലൈനായി ബന്ധിപ്പിക്കും.
വാക്സിനേഷന്‍ ആരംഭിച്ചിട്ടില്ലാത്തതിനാല്‍ മൂന്നാം തരംഗം ഉണ്ടായാല്‍ ഏറെ ബാധിക്കുന്നത് കുട്ടികളെയാണെന്നു കണ്ടെത്തിയതിനാല്‍ പീഡിയാട്രിക് ചികിത്സാ സംവിധാനങ്ങള്‍ വര്‍ധിപ്പിച്ചിട്ടുണ്ട്.
490 ഓക്സിജന്‍ സജ്ജീകരണമുള്ള പീഡിയാട്രിക് കിടക്കകള്‍, 158 എച്ച്ഡിയു കിടക്കകള്‍, 96 ഐസിയു കിടക്കകള്‍ എന്നിങ്ങനെ ആകെ 744 കിടക്കകളാണ് കുട്ടികള്‍ക്കായി ക്രമീകരിക്കുന്നത്.
ഓക്സിജന്‍റെ ലഭ്യത ഉറപ്പു വരുത്താന്‍ പ്രത്യേക പ്രാധാന്യം നല്‍കിവരുന്നു. സംസ്ഥാനത്ത് ആകെ 870 ടണ്‍ ഓക്സിജന്‍ കരുതല്‍ ശേഖരമുണ്ട്.
നിര്‍മാണ കേന്ദ്രങ്ങളില്‍ 500 ടണ്ണും കെഎംഎസ്‌സിഎല്‍ ബഫര്‍ സ്റ്റോക്കായി 80 ടണ്ണും ഓക്സിജന്‍ കരുതിയിട്ടുണ്ട്. ഇതുകൂടാതെ ആശുപത്രികളില്‍ 290 ടണ്‍ ഓക്സിജനും കരുതല്‍ ശേഖരമായിട്ടുണ്ട്.
33 ഓക്സിജന്‍ ജനറേഷന്‍ യൂണിറ്റുകൾ സജ്ജമാക്കി വരുന്നുണ്ട്. ഇതിലൂടെ 77 ടണ്‍ ഓക്സിജന്‍ അധികമായി നിര്‍മിക്കാന്‍ സാധിക്കും.
ഇതില്‍ ഒമ്പതെണ്ണം പ്രവര്‍ത്തനസജ്ജമായിക്കഴിഞ്ഞു. 38 ഓക്സിജന്‍ ജനറേഷന്‍ യൂണിറ്റുകള്‍ സ്ഥാപിക്കാനുള്ള നടപടികള്‍ പുരോഗമിക്കുകയാണ്.
സര്‍ക്കാർ നിര്‍ദേശ പ്രകാരം 13 ടണ്‍ ഓക്സിജന്‍ പ്രതിദിനം നിര്‍മിക്കുന്നതിനുള്ള ഓക്സിജന്‍ ജനറേഷന്‍ സിസ്റ്റം സ്വകാര്യ ആശുപത്രികളില്‍ സ്ഥാപിച്ചിട്ടുണ്ട്.
ചുമ, തൊണ്ടവേദന, പനി, ജലദോഷം, ശരീരവേദന, തലവേദന തുടങ്ങിയവ ഉണ്ടെങ്കിൽ യാത്ര നടത്താതെ കോവിഡ് പരിശോധന നടത്തി കോവിഡ് അല്ലെന്ന് ഉറപ്പിക്കണം.
മൂക്കും വായും ശരിയായി മൂടത്തക്ക വിധം ഡബിള്‍ മാസ്കോ എന്‍ 95 മാസ്കോ ധരിക്കണം.
വ്യക്തികള്‍ തമ്മില്‍ ചുരുങ്ങിയത് രണ്ടു മീറ്റര്‍ അകലം പാലിക്കുകയും കൈകള്‍ ഇടയ്ക്കിടയ്ക്ക് സോപ്പും വെള്ളവും ഉപയോഗിച്ച് കഴുകുകയോ സാനിറ്റൈസര്‍ ഉപയോഗിച്ച് അണുവിമുക്തമാക്കുകയോ ചെയ്യണമെന്നും മന്ത്രി നിർദേശിച്ചു.
