മലയാളികളുടെ ഇഷ്ടഗായകനാണ് എംജി ശ്രീകുമാര്‍. എംജിയുടെ ഭാര്യ ലേഖ ശ്രീകുമാറിനെയും മലയാളികള്‍ക്ക് ഏറെ ഇഷ്ടമാണ്.
ജീവിതത്തെക്കുറിച്ചും എം ജി ശ്രീകുമാറിനെക്കുറിച്ചും ലേഖ ഇപ്പോള്‍ മനസു തുറന്നിരിക്കുകയാണ്. തനിക്കൊരു മകളുണ്ടെന്നും അക്കാര്യം എല്ലാവര്‍ക്കും അറിയാമെന്നും ഒരു മാസികയ്ക്കു നല്‍കിയ അഭിമുഖത്തിലാണ് ലേഖ ശ്രീകുമാര്‍ പറഞ്ഞത്.
അധികം സംസാരിക്കാത്ത ലേഖയെക്കുറിച്ച പലതരത്തിലാണ് ആളുകള്‍ക്കിടയില്‍ ഗോസിപ്പുകള്‍ പരന്നത്. എന്നാല്‍, കഴിഞ്ഞയിടെ ലേഖ ഒരു യുട്യൂബ് ചാനല്‍ തുടങ്ങി സ്വന്തം വിശേഷങ്ങള്‍ പങ്കുവെച്ചു തുടങ്ങിയതോടെയാണ് ആളുകളുടെ തെറ്റിദ്ധാരണകള്‍ മാറാന്‍ തുടങ്ങിയത്.
എം ജി ശ്രീകുമാറിനെ കണ്ടുമുട്ടിയതാണ് ജീവിതത്തിലെ ഏറ്റവും സുന്ദരനിമിഷം എന്ന് ലേഖ പറഞ്ഞിട്ടുണ്ട്. തന്റെ സൗന്ദര്യത്തിനു പിന്നില്‍ ഭര്‍ത്താവിന്റെ സ്‌നേഹമാണെന്നും താന്‍ ഒന്നും പറയാതെ തന്നെ തനിക്കായി വേണ്ടതൊക്കെ ചെയ്യുന്ന ആളാണ് ശ്രീക്കുട്ടനെന്നും ലേഖ തുറന്നു പറഞ്ഞിട്ടുണ്ട്.
ഇപ്പോള്‍ പുതുതായി തുടങ്ങിയിരിക്കുന്ന യുട്യൂബ് ചാനലിന്റെ പേര് ലേഖ എം ജി ശ്രീകുമാര്‍ എന്നാണ്. പാചകക്കുറിപ്പുകളും ഡയറ്റ് പ്ലാനുകളും ബ്യൂട്ടി ടിപ്‌സുമാണ് പ്രധാനമായും ഇതില്‍ ലേഖ പങ്കുവെയ്ക്കുന്നത്.
തനിക്ക് മറച്ചു പിടിക്കാന്‍ ഒന്നുമില്ലെന്നും തനിക്കൊരു മോളുണ്ടെന്നത് എല്ലാവര്‍ക്കും അറിയാവുന്ന കാര്യമാണെന്നും ലേഖ പറയുന്നു.
മകള്‍ കല്യാണം കഴിഞ്ഞ് അമേരിക്കയിലാണെന്നും സന്തോഷകരമായി ജീവിക്കുന്നുവെന്നും ലേഖ കൂട്ടിച്ചേര്‍ത്തു. ശ്രീക്കുട്ടന്റെ പാട്ട് കേട്ട് എടുത്ത തീരുമാനം അല്ല തന്റേതെന്നും പരസ്പരം പൂര്‍ണമായി മനസിലാക്കിയ ശേഷമെടുത്ത തീരുമാനമായിരുന്നു വിവാഹമെന്നും ലേഖ പറഞ്ഞു. ഉത്തരവാദിത്തങ്ങള്‍ പൂര്‍ത്തിയാക്കിയതിനു ശേഷമായിരുന്നു വിവാഹിതരായതെന്നും ലേഖ വ്യക്തമാക്കി.
