ഐപിഎൽ 2022 മെഗാ താര ലേലത്തിൽ ആർക്കും വേണ്ടാത്തവരായി പ്രമുഖ താരങ്ങൾ. ചെന്നൈ സൂപ്പർ കിംഗ്സിന്‍റെ താരമായിരുന്നു ഇന്ത്യൻ മൂൻ താരം സുരേഷ് റെയ്നയെ ലേലം കൊള്ളാൻ ആരും തയാറായില്ല.
രണ്ട് കോടി രൂപയായിരുന്നു റെയ്നയുടെ അടിസ്ഥാന വില. യുഎഇയിൽ നടന്ന 2020 ഐപിഎൽ സീസണിനിടെ റെയ്ന നാട്ടിലേക്ക് മടങ്ങിയത് ചെന്നൈ സൂപ്പർ കിംഗ്സിനു കനത്ത ക്ഷീണം ചെയ്തിരുന്നു.
ഓസ്ട്രേലിയൻ ബാറ്ററായ സ്റ്റീവ് സ്മിത്ത്, ബംഗ്ലാദേശ് ഓൾ റൗണ്ടർ ഷക്കീബ് അൽ ഹസൻ, ഓസീസ് വിക്കറ്റ് കീപ്പറായ മാത്യു വേഡ്, ഇന്ത്യൻ പേസർ ഉമേഷ് യാദവ്, ദക്ഷിണാഫ്രിക്കൻ സ്പിന്നർ ഇമ്രാൻ താഹിർ, ഓസീസ് സ്പിന്നർ ആദം സാംപ, ഇന്ത്യൻ സ്പിന്നർ അമിത് മിശ്ര, ദക്ഷിണാഫ്രിക്കൻ ബാറ്റർ ഡേവിഡ് മില്ലർ, ഇന്ത്യൻ വിക്കറ്റ് കീപ്പർ വൃദ്ധിമാൻ സാഹ, ഇംഗ്ലീഷ് വിക്കറ്റ് കീപ്പർ സാം ബില്ലിംഗ്സ്, ഇംഗ്ലീഷ് സ്പിന്നർ ആദിൽ റഷീദ് തുടങ്ങിയ പ്രമുഖരെയും ഇന്നലെ ലേലത്തിൽ എടുക്കാൻ ഫ്രാഞ്ചൈസികൾ തയാറായില്ല.
