പള്ളുരുത്തി (കൊച്ചി): സിപിഎം സംസ്ഥാന സമ്മേളനത്തിനുള്ള ഒരുക്കങ്ങൾ തകൃതിയായി നടക്കുന്നതിനിടെ എറണാകുളം ജില്ലയില്‍ ഇതാദ്യമായി വി.എസ്. അച്യുതാനന്ദന്‍റെ കട്ടൗട്ട് ഉയർന്നു.
ഒരുകാലത്ത് വി.എസിന്‍റെ ശക്തമായ തട്ടകമായിരുന്ന പള്ളുരുത്തിയിലാണ് അദ്ദേഹത്തിന്‍റെ അനുയായികള്‍ കൂറ്റൻ കട്ടൗട്ട് ഉയര്‍ത്തിയത്.
ദീർഘകാലം സംസ്ഥാന സെക്രട്ടറിയും മുൻ മുഖ്യമന്ത്രിയുമായ വി.എസിന്‍റെ ചിത്രം ഔദ്യോഗിക പക്ഷത്തിന്‍റെ പ്രചാരണ ബോർഡുകളിൽ ഒരിടത്തും ഇല്ലാതിരിക്കെ പള്ളുരുത്തിയിലെ കട്ടൗട്ട് ഏറെ ശ്രദ്ധിക്കപ്പെടുന്നു.
പള്ളുരുത്തി ഏരിയാകമ്മറ്റിക്ക് കീഴില്‍ പെരുമ്പടപ്പ് വെസ്റ്റ് ബ്രാഞ്ചിന്‍റെ പേരില്‍ കുമ്പളങ്ങി ജംഗ്ഷനിലാണ് കട്ടൗട്ട് ഉയര്‍ത്തിയത്.
32 പേരില്‍ അസ്തമിക്കാത്തൊരാള്‍, കനലെരിയുന്ന സൂര്യന്‍ സഖാവ് വി.എസ് എന്നീ വാചകങ്ങൾ കട്ടൗട്ടിന് താഴെ എഴുതിയിട്ടുണ്ട്.
കടുത്ത വി.എസ് അനുയായി ആയിരുന്ന പി.എ. പീറ്ററാണ് നിലവില്‍ ഏരിയ സെക്രട്ടറി.
ജീവിച്ചിരിക്കുന്നതില്‍ ഏറ്റവും മുതിര്‍ന്ന സിപിഎം നേതാക്കളിലൊരാളാണെന്നതു പരിഗണിച്ചാണ് ഏതാനും പേര്‍ അദ്ദേഹത്തിന്‍റെ കട്ടൗട്ട് സ്ഥാപിച്ചതെന്നും ഇതില്‍ വിഭാഗീയത കാണേണ്ടതില്ലെന്നും പി.എ. പീറ്റര്‍ പറഞ്ഞു.
സമ്മേളന പ്രചാരണാര്‍ഥം സ്ഥാപിച്ചിട്ടുള്ള ബോർഡുകളിലും പോസ്റ്ററുകളിലും മണ്‍മറഞ്ഞു പോയ പ്രമുഖ നേതാക്കളുടെ ചിത്രങ്ങൾക്കൊപ്പം മുഖ്യമന്ത്രി പിണറായി വിജയന്‍റെയും ദേശീയ-സംസ്ഥാന സെക്രട്ടറിമാരുടെയും ചിത്രങ്ങളാണുള്ളത്. കൊച്ചിയിൽ മാർച്ച് ഒന്നു മുതൽ നാലു വരെയാണ് സമ്മേളനം.
