മണിമല: പുനർവിവാഹത്തിനു പരസ്യം ചെയ്തു യുവതിയെ കബളിപ്പിച്ച് സ്വർണം കവർന്നയാൾ പോലീസ് പിടിയിൽ.
എറണാകുളം ഉദയംപേരൂർ പുല്യാട്ട് വിഷ്ണുകൃപ അയ്യപ്പദാസ് (31) ആണ് അറസ്റ്റിലായത്. പഴയിടം സ്വദേശിയായ യുവതിയുടെ 17 ഗ്രാം സ്വർണാഭരണങ്ങളാണ് ഇയാൾ കബളിപ്പിച്ചെടുത്തത്.
വിവാഹ വാഗ്ദാനം നൽകി അയ്യപ്പദാസ് യുവതിയുടെ ആദ്യവിവാഹം വേർപെടുത്തിയ വകയിൽ കിട്ടാനുള്ള ഒന്പതു പവൻ സ്വർണവും 12 ലക്ഷം രൂപയും കോടതി മുഖേനെ വാങ്ങിത്തരാമെന്നും ഇതിന്‍റെ ചെലവിലേക്കെന്നു പറഞ്ഞാണ് ഒരുമാസം മുന്പ് സ്വർണാഭരങ്ങൾ വാങ്ങിച്ചെടുത്തത്.
കേസിന്‍റെ നടത്തിപ്പിനുള്ള ചെലവിനായി സ്വർണമാലകൂടി വേണമെന്ന് ഇയാൾ ആവശ്യപ്പെട്ടു.
ഇതിൽ യുവതിയുടെ പിതാവിന് സംശയം തോന്നിയതിനാൽ മണിമല പോലീസിൽ പരാതി നൽകി.
ശേഷം യുവാവിനോട് വീട്ടിലേക്ക് വരാൻ ആവശ്യപ്പെട്ടു. സ്വർണമാല വാങ്ങാനെത്തുന്ന വിവരം പോലീസിനെ അറിയിക്കുകയും പ്രതിയെ പിടികൂടി അറസ്റ്റ് ചെയ്യുകയായിരുന്നു.
ഇയാൾ വിവാഹമോചിതരായ പല യുവതികളിൽനിന്നും ഇപ്രകാരം പണവും സ്വർണാഭരണങ്ങളും തട്ടിയെടുത്തിട്ടുള്ളതായി പോലീസ് പറഞ്ഞു.
