കോട്ടയം: കെഎസ്ആർടിസി ബസിൽ യുവതിയെ ശല്യം ചെയ്ത പോലീസുകാരൻ പിടിയിൽ. പത്തനംതിട്ട ഇലവുംതിട്ട സ്റ്റേഷനിലെ എഎസ്ഐയാണ് യാത്രക്കാരിയായ യുവതിയെ ശല്യം ചെയ്തത്.
ഇന്നലെ ഉച്ചയ്ക്കായിരുന്നു സംഭവം. ചെങ്ങന്നൂരിൽനിന്നും കോട്ടയത്തേക്ക് വന്ന ബസിനുള്ളിൽ യുവതിയെ സഹയാത്രികനായ ഇയാൾ ശല്യം ചെയ്യുകയായിരുന്നു.
ശല്യം അസഹനീയമായതോടെ യുവതി കണ്ടക്ടറോടു പരാതി പറഞ്ഞു. കോട്ടയത്ത് ബസ് എത്തിയപ്പോൾ വിവരമറിയിച്ചതിനെത്തുടർന്ന് വെസ്റ്റ് പോലീസെത്തി ഇയാളെ കസ്റ്റഡിയിലെടുത്തു.
പോലീസ് സ്റ്റേഷനിലെത്തിയപ്പോഴാണ് പ്രതി എഎസ്ഐയാണെന്ന് തിരിച്ചറിഞ്ഞത്.
സംഭവത്തിൽ യുവതി രേഖാമൂലം പരാതി നൽകാൻ തയാറാകാത്തതിനാൽ പോലീസ് കേസെടുക്കാതെ പ്രതിയെ വിട്ടയച്ചു.
ഇയാൾക്കെതിരേ ജില്ലാ പോലീസ് മേധാവിക്ക് റിപ്പോർട്ട് നൽകുമെന്ന് വെസ്റ്റ് സ്റ്റേഷൻ എസ്ഐ ടി. ശ്രീജിത്ത് പറഞ്ഞു.
