നഗരത്തിലെ വിവിധറോഡുകളില്‍ അസമയത്ത് ‘എല്‍’ എന്ന അടയാളം കണ്ടതോടെ ആശങ്കപ്പെട്ട് നാട്ടുകാര്‍.
കെ റെയില്‍ കല്ലിടല്‍ വ്യാപകമായതിനാല്‍ ഇനി ഭൂമി ഏറ്റെടുക്കാനുള്ള അടയാളമെന്ന് പലരും സംശയിച്ചു.
അതേസമയം, ഡ്രോണ് സര്‍വേയുടെ ഭാഗമായാണ് ഈ അടയാളം രേഖപ്പെടുത്തിയതെന്ന് പോലീസ് വിശദീകരിച്ചതോടെയാണ് നാട്ടുകാര്‍ക്ക് ആശ്വാസമായത്.
രാത്രിയിലായിരുന്നു റോഡുകളില്‍ എല്‍ അടയാളം രേഖപ്പെടുത്തിയത്. നേരം പുലര്‍ന്നപ്പോഴാണ് നാട്ടുകാര്‍ എല്‍ അടയാളം കണ്ടത്.
ആരാണ് ഇത് വരച്ചതെന്ന് അറിയാന്‍ കോര്‍പ്പറേഷന്‍ ഉദ്യോഗസ്ഥരുമായി ബന്ധപ്പെട്ടു. പക്ഷേ, അവര്‍ക്കും അറിയില്ലായിരുന്നു. അതിനിടെ, പോലീസ് ഉദ്യോഗസ്ഥരെ വിളിച്ചും ചിലര്‍ കാര്യമറിയിച്ചു.
പോലീസ് നടത്തിയ അന്വേഷണത്തില്‍ ഇത് ഡ്രോണ് സര്‍വേയുടെ ഭാഗമായി രേഖപ്പെടുത്തിയ അടയാളമാണെന്ന് വ്യക്തമായി.
ഡ്രോണ് കാമറയില്‍ തെളിയാന്‍ വേണ്ടിയാണ് ഇതു അടയാളപ്പെടുത്തിയെന്ന് ഉദ്യോഗസ്ഥര് വിശദീകരിച്ചു. പോലീസിന്റെ വിശദീകരണത്തോടെയാണ് നാട്ടുകാരുടെ ആശങ്ക മാറിയത്.
