അടൂര്‍: വിഷു ചിത്രങ്ങള്‍ പകര്‍ത്താനുള്ള ഫോട്ടോഗ്രാഫറുടെ ശ്രമങ്ങളും അതിനെയെല്ലാം നിഷ്പ്രഭമാക്കുന്ന കണ്ണനും ഒടുവില്‍ ഏറെ പണിപ്പെട്ടെടുത്ത ചിത്രങ്ങളും വീഡിയോയും വൈറലായി.
കഴിഞ്ഞ ദിവസങ്ങളില്‍ സോഷ്യല്‍ മീഡിയയില്‍ ഏറെ തരംഗമുയര്‍ത്തിയ ചിത്രങ്ങളായിരുന്നു കണ്ണന്‍റേതായി പങ്കുവയ്ക്കപ്പെട്ടത്.
ഫോട്ടോഷൂട്ടിനായി വാങ്ങിയ വിഷുക്കണിയിലെ പഴങ്ങള്‍ ഓരോന്നായി കണ്ണന്‍ വെള്ളത്തിലേക്ക് വലിച്ചെറിയുന്നതാണ് വീഡിയോയില്‍.
കണ്ണനെ പിന്തിരിപ്പിക്കാന്‍ ശ്രമിക്കുന്ന അമ്മയുടെയും സുഹൃത്ത് അഭിലാഷിന്‍റെയും നിസഹായാവസ്ഥയും ഫോട്ടോഗ്രാഫറുടെ ബുദ്ധിമുട്ടും വീഡിയോയിലൂടെ വ്യക്തമാണ്. എന്നിരുന്നാലും അവസാനം എടുത്ത മനോഹരമായ ചിത്രങ്ങള്‍ വീഡിയോയില്‍ കാണാം.
കണ്ണനെ അമ്പാടി കണ്ണനോട് ഉപമിച്ചാണ് വീഡിയോയ്ക്കു ലഭിച്ച കമന്‍റുകളേറെയും. ലക്ഷക്കണക്കിനാളുകളാണ് കുറഞ്ഞ സമയംകൊണ്ട് വീഡിയോ കണ്ടത്.
എന്തായാലും ഫോട്ടോ ശ്രദ്ധിക്കപ്പെട്ടതിന്‍റെ സന്തോഷത്തിലാണ് അണിയറ പ്രവര്‍ത്തകര്‍. അടൂര്‍ തെങ്ങുംതാരയില്‍ പ്രേം ഗോപാല്‍, രാധിക ദമ്പതികളുടെ മകനാണ് കണ്ണന്‍.
തെങ്ങുംതാര ജംഗ്ഷനില്‍ തന്നെ ഫോട്ടോസ്റ്റുഡിയോ നടത്തുന്ന ബിനേഷ് എസ്. കുമാറാണ് ഫോട്ടോഗ്രാഫര്‍ . വിഷുച്ചിത്രം പകര്‍ത്തണം എന്ന ഉദ്ദേശം മാത്രമേ ഉണ്ടായിരുന്നുള്ളുവെന്നും ഇപ്പോള്‍ വീഡിയോ വൈറല്‍ ആയതില്‍ ഒരുപാട് സന്തോഷം ഉണ്ടെന്നും ഫോട്ടോഗ്രാഫര്‍ ബിനേഷ് പറഞ്ഞു.
