തളിപ്പറമ്പ്: പ്രായപൂര്‍ത്തിയാകാത്ത വിദ്യാര്‍ഥിനിയെ പീഡിപ്പിച്ച അധ്യാപകന് ഏഴുവര്‍ഷം തടവും 20,000 രൂപ പിഴയും.
തളിപ്പറമ്പ് ചിറവക്കിലെ കെ.പി.വി. സതീഷ്‌കുമാറി (62)നെയാണ് തളിപ്പറമ്പ് അതിവേഗ കോടതി ശിക്ഷിച്ചത്.
2017 ഓഗസ്റ്റ് 20 നായിരുന്നു കേസിനാസ്പദമായ സംഭവം. തളിപ്പറമ്പ് ചിറവക്ക് രാജരാജേശ്വര ക്ഷേത്രത്തിനടുത്തുള്ള പ്രതിയുടെ വീട്ടില്‍ ട്യൂഷന്‍ സെന്‍റര്‍ നടത്തിയിരുന്നു.
ഇവിടെ ട്യൂഷനെത്തിയ പെണ്‍കുട്ടിയെ പീഡിപ്പിച്ചുവെന്നാണ് കേസ്.
പ്രതിയെ അന്നത്തെ തളിപ്പറമ്പ് ഇന്‍സ്‌പെക്ടര്‍ പി.കെ. സുധാകരന്‍ 2017 സെപ്റ്റംബര്‍ 20 ന് അറസ്റ്റ് ചെയ്തിരുന്നു.
ഈ കേസിലാണ് തളിപ്പറമ്പ് അതിവേഗ കോടതി ജഡ്ജി പി.മുജീബ്‌റഹ്മാന്‍ വിധി പറഞ്ഞത്.
പോക്‌സോ ഉള്‍പ്പെടെ നാല് വകുപ്പുകള്‍ പ്രകാരം പ്രതി കുറ്റക്കാരനാണെന്ന് കോടതി കണ്ടെത്തി. നേരത്തെ അരോളി ഗവ.ഹയര്‍ സെക്കന്‍ഡറി സ്‌കൂള്‍ മുഖ്യാധ്യാപകനായിരുന്നു പ്രതി.
