കോഴഞ്ചേരി: മാള്‍ട്ട, ബല്‍ഗേറിയ, ഖത്തര്‍, കമ്പോഡിയ തുടങ്ങിയ രാജ്യങ്ങളിലേക്ക് ജോലി ഒഴിവുകള്‍ ഉണ്ടെന്ന് വിശ്വസിപ്പിച്ചശേഷം 17 ലക്ഷത്തിലധികം രൂപ തട്ടിയെടുത്തയാളെ കോയിപ്രം പോലീസ് പിടികൂടി. കണ്ണൂര്‍ ഇരിക്കൂര്‍ വെള്ളാട് കുട്ടിക്കുന്നുമ്മേല്‍ നിമല്‍ ലക്ഷ്മണ(25)നാ ണ് പിടിയിലായത്.
കഴിഞ്ഞ ഏപ്രില്‍ 11 മുതല്‍ മേയ് 28 വരെയുള്ള കാലയളവിലാണ് തട്ടിപ്പ് നടന്നത്. പുറമറ്റം വെണ്ണിക്കുളം വാലാങ്കര പുളിക്കല്‍ ഹരീഷ് കൃഷ്ണനാണ് പരാതിക്കാരന്‍.
ഹരീഷിന്റെയും മറ്റും ഉടമസ്ഥതയില്‍ വെണ്ണിക്കുളത്ത് പ്രവര്‍ത്തിക്കുന്ന ‘ഡ്രീം ഫ്യൂച്ചര്‍ കണ്‍സള്‍ട്ടന്‍സ് ‘എന്ന എന്ന സ്ഥാപനത്തെയാണ് പ്രതി ചതിച്ച് പണം തട്ടിയത്.
മാള്‍ട്ടയിലേക്ക് 25000 രൂപ വീതം നാല് ലക്ഷം രൂപയും ബള്‍ഗേറിയയിലേക്ക് അഞ്ചുലക്ഷം രൂപയും ഖത്തറിലേക്ക് 25000 രൂപയും കമ്പോഡിയയിലേക്ക് 810000 രൂപയും ഉള്‍പ്പെടെ ജോലിക്കുള്ള വീസയുടെ തുകയായി 1735000 രൂപയാണ് നെറ്റ് ബാങ്കിംഗ് മുഖേന നിമല്‍ തട്ടിയെടുത്തതെന്ന് പറയുന്നു.
വീസ ലഭ്യമാക്കുകയോ, തുക തിരികെ നല്‍കുകയോ ചെയ്യാതെ വന്നതോടെയാണ് പോലീസില്‍ പരാതി നല്‍കിയത്. ഓഗസ്റ്റ് 17 ന് കോയിപ്രം പോലീസ് കേസെടുത്ത് അന്വേഷണം തുടങ്ങി.
തട്ടിപ്പുവിവരങ്ങള്‍ ശേഖരിച്ച പോലീസ് സംഘം സൈബര്‍സെല്ലിന്റെ സഹായത്തോടെ കണ്ണൂരിലെത്തി നിമല്‍ ലക്ഷ്മണനെ അറസ്റ്റു ചെയ്തു.
ഇയാള്‍ സമാനരീതിയില്‍ വേറെയും തട്ടിപ്പ് നടത്തിയിട്ടുണ്ടോയെന്ന് തുടങ്ങിയ കാര്യങ്ങളില്‍ വിശദമായ അന്വേഷണം നടത്താന്‍ ജില്ലാ പോലീസ് മേധാവി സ്വപ്നില്‍ മധുകര്‍ മഹാജന്‍ നിര്‍ദേശിച്ചു.
പ്രതി കബളിപ്പിച്ച് തട്ടിയെടുത്ത പണം കണ്ടെത്തുന്നതിനും മറ്റുമുള്ള അന്വേഷണം ഊര്‍ജ്ജിതമാക്കിയിട്ടുണ്ട്. തിയെ കോടതിയില്‍ ഹാജരാക്കി.
പോലീസ് ഇന്‍സ്പെക്ടര്‍ സജീഷ് കുമാറിന്റെ നേതൃത്വത്തിലുള്ള അന്വേഷണസംഘത്തില്‍ എസ്‌ഐമാരായ സുരേഷ് കുമാര്‍, മധു, എസ്‌സിപിഒ സുധീന്‍ ലാല്‍ എന്നിവരാണുള്ളത്.
