കോഴിക്കോട്: കോഴിക്കോട് ഖാസി സയിദ് മുഹമ്മദ് കോയ ജമലുല്ലൈലി തങ്ങള്‍ക്കെതിരേ പീഡനക്കേസ്. കണ്ണൂര്‍ സ്വദേശിനി കോഴിക്കോട് വനിതാ സ്‌റ്റേഷനില്‍ നല്‍കിയ പരാതിയിലാണ് പീഡനക്കുറ്റത്തിന് കേസ് രജിസ്റ്റര്‍ ചെയ്തത്.
രണ്ടാം ഭര്‍ത്താവുമായുള്ള കുടുംബപ്രശ്‌നം പരിഹരിക്കാമെന്ന് വാഗ്ദാനംചെയ്ത് രണ്ടു വര്‍ഷത്തിനിടയില്‍ ഖാസി പലതവണ പീഡിപ്പിച്ചുവെന്നാണ് യുവതിയുടെ പരാതി.
പരപ്പനങ്ങാടി ആനങ്ങാടിയിലെ വീടിനു മുന്നിലെ സന്ദര്‍ശകര്‍ക്കുള്ള ഷെഡില്‍ വച്ചാണ് പീഡിപ്പിച്ചതെന്ന് പോലീസില്‍ നല്‍കിയ മൊഴിയില്‍ യുവതി പറയുന്നു. ഖാസിയുടെ ഡ്രൈവര്‍ പ്രേരിപ്പിച്ചെന്ന പരാതിയില്‍ ഇയാള്‍ക്കെതിരേയും കേസെടുത്തിട്ടുണ്ട്.
അതേസമയം, പീഡിപ്പിച്ചെന്ന പരാതി സമ്മര്‍ദതന്ത്രത്തിന്‍റെ ഭാഗമാണെന്ന് ഖാസിയുടെ ഓഫീസ് അറിയിച്ചു. ഖാസി സയ്യിദ് മുഹമ്മദ് കോയ തങ്ങള്‍ക്കെതിരെ ഉയര്‍ന്ന ആരോപണം അടിസ്ഥാനരഹിതവും കെട്ടിച്ചമച്ചതുമാണ്.
രണ്ട് കുട്ടികളുടെ മാതാവായ പരാതിക്കാരി ആദ്യ ഭര്‍ത്താവുമായി ദാമ്പത്യജീവിതം നയിക്കുന്നതിനിടയില്‍ വര്‍ഷങ്ങള്‍ക്കു മുമ്പ് കാമുകനോടൊപ്പം ഇളയ കുട്ടിയുമായി ഒളിച്ചോടുകയും ബംഗളൂരുവില്‍ പോയി ജീവിക്കുകയും ചെയ്തു.
പിന്നീട് ആദ്യ ഭര്‍ത്താവ് വിവാഹമോചനം നടത്തുകയും കാമുകനെ വിവാഹം കഴിക്കുകയും ചെയ്തു. തന്‍റെ കൈവശമുള്ള ഭീമമായ തുകയും സ്വര്‍ണവും ചെലവഴിച്ചു തീര്‍ന്നശേഷം ചാലിയം കരുവന്‍തിരുത്തിയില്‍ താമസമാക്കിയ പരാതിക്കാരി ഇരുവരുമായുള്ള ബന്ധം തുടരാന്‍ സാധിക്കാത്ത സാഹചര്യത്തില്‍ മഹല്ല് കമ്മിറ്റിയുമായി ബന്ധപ്പെട്ടു.
പിന്നീട് അവര്‍ മുഖേന ഖാസിയുമായും ബന്ധപ്പെട്ടു. തുടര്‍ന്ന് അഭിഭാഷകര്‍ മുഖേന രണ്ടാം ഭര്‍ത്താവുമായും പരാതിക്കാരിയുമായും മധ്യസ്ഥ ചര്‍ച്ചകള്‍ നടത്തുകയും വിവാഹമോചനക്കരാര്‍ തയാറാക്കുകയും ചെയ്തു.
പരാതിക്കാരിക്ക് രണ്ടാം ഭര്‍ത്താവ് ഏഴ് ലക്ഷം രൂപ നഷ്ടപരിഹാരം നല്‍കി പ്രശ്നം പരിഹരിക്കണം എന്നായിരുന്നു വ്യവസ്ഥ.
അതിലേക്ക് ഒരു ലക്ഷം രൂപ നല്‍കുകയും ബാക്കി പണം രണ്ടുവര്‍ഷത്തിനകം നല്‍കാമെന്നു വ്യവസ്ഥയാക്കുകയും ചെയ്തു.
തുടര്‍ന്ന് കണ്ണൂരിലേക്ക് തിരിച്ചുപോയ പരാതിക്കാരിയെക്കുറിച്ച് ഒരു വര്‍ഷത്തോളം വിവരമൊന്നും ഉണ്ടായിരുന്നില്ല.
ഇതിനിടെ ബാക്കി പണം ആവശ്യപ്പെട്ട് യുവതി മധ്യസ്ഥന്മാരെ സമീപിക്കുകയും രണ്ടാം ഭര്‍ത്താവില്‍നിന്നു മധ്യസ്ഥന്മാര്‍ പണം വാങ്ങിക്കൊടുക്കണം എന്ന് ആവശ്യപ്പെട്ട് നിരന്തരം മധ്യസ്ഥന്മാരെ ബന്ധപ്പെടുകയും ഭീഷണിപ്പെടുത്തുകയും ചെയ്തു.
താമസിച്ചുകൊണ്ടിരുന്ന ഫ്ളാറ്റില്‍നിന്ന് ഇറക്കിവിട്ടെന്ന് പറഞ്ഞ് കഴിഞ്ഞ മാസം അവസാനം മധ്യസ്ഥന്മാരെ ബന്ധപ്പെട്ടിരുന്നു.
ഇതിനായി രണ്ടാം ഭര്‍ത്താവുമായി പ്രശ്നം പരിഹരിക്കാന്‍ ശ്രമം നടക്കുന്നതിനിടയിലാണ് ഇപ്പോള്‍ വ്യാജപരാതിയുമായി ഇവര്‍ രംഗത്ത് വന്നത്.
ഇത് സമ്മര്‍ദതന്ത്രത്തിന്‍റെ ഭാഗം മാത്രമാണെന്നും പൊതുജനം തെറ്റിദ്ധരിക്കരുതെന്നും ഖാസിയുടെ ഓഫീസ് അറിയിച്ചു.
