കോട്ടയം: ലാത്തിരി, പൂത്തിരി പുഞ്ചിരിച്ചെപ്പോ കന്പിത്തിരി മത്താപ്പോ… മനസേ ആസ്വദിക്കൂ ആവോളം…ക്രിസ്മസ് ആഘോഷങ്ങൾക്ക് മാറ്റുകൂട്ടാൻ പടക്കവിപണിയും സജീവമായി.
ക്രിസ്മസിന് ഒരു ദിവസം ബാക്കിനിൽക്കേ പടക്കവിപണിയിൽ വലിയ തിരക്കാണ് അനുഭവപ്പെടുന്നത്. ചൈനീസ് പടക്കങ്ങൾക്കാണ് ആവശ്യക്കാർ ഏറെ.
കുട്ടികൾക്കായി, പൊള്ളലേൽക്കാത്ത പ്രത്യേക പടക്കങ്ങളുമുണ്ട്. ജില്ലയുടെ വിവിധ ഭാഗങ്ങളിൽ ക്രിസ്മസ്, ന്യൂഇയറിനോടനുബന്ധിച്ച് പ്രത്യേകം കൂടാര രൂപത്തിൽ പടക്ക സ്റ്റാളുകളും ഒരുങ്ങിയിട്ടുണ്ട്.
കിറ്റ്കാറ്റ്, മൾട്ടികളർ ഷോട്ട്സ്, റോക്കറ്റ്, ക്ലാസിക് ബോംബ്, ഹൈഡ്രോ ബോംബ്, കോറോണാസ്, സിപ്പി എന്നിവയും സൂപ്പർ ഷോട്ടുകൾ, ത്രിവർണ പൂക്കുറ്റി, ഫാൻസി പടക്കങ്ങൾ, സ്കൈ ഷോട്ട് ഡ്രോണ്, ഹെലികോപ്ടർ എന്നിവയും ഇത്തവണയുണ്ട്.
തീ കൊടുത്താൽ ആൻഗ്രി ബേർഡ്സ് മോഡലാകുന്ന പടക്കവും ഡിസ്കോ വീൽ മോഡൽ ചക്രവുമാണ് മറ്റൊരു പ്രധാന ഇനം. വലിയ ഉയരത്തിൽ പോയി പൊട്ടുന്ന സ്കൈ ഷോട്ടിനും ആവശ്യക്കാരേറെയാണ്.
ഓലപ്പടക്കങ്ങൾ, മാലപ്പടക്കങ്ങൾ, കന്പിത്തിരി, പൂത്തിരി, ചക്രം, കുടചക്രം, പൂക്കുറ്റി തുടങ്ങിയ ഇഷ്ട ഇനങ്ങൾക്കാണ് ആവശ്യക്കാരേറെ ആകാശത്ത് വിവിധ കളറുകളിൽ വിവിധ ഡിസൈനുകളിലും പൊട്ടുന്ന ചൈനീസ് ഇനങ്ങൾക്കും ഡിമാന്‍റാണ്.
