കോളേജ് വിട്ടു വീട്ടിലേക്ക് പോയ പെണ്‍കുട്ടിയെ വഴിയില്‍ വെച്ച് ആക്രമിച്ച പ്രതി പിടിയില്‍. ഇയാള്‍ വഴിയില്‍ വെച്ച് 17കാരിയെ വെട്ടിപ്പരിക്കേല്‍പ്പിക്കുകയായിരുന്നു.
സംഭവത്തില്‍ ഒറ്റപ്പാലം പാലപ്പുറം പാറയ്ക്കല്‍ വീട്ടില്‍ മുഹമ്മദ് ഫിറോസിനെ(25) പോലീസ് അറസ്റ്റുചെയ്തു.
ഫിറോസിന്റെ മൊബൈല്‍ നമ്പര്‍ പെണ്‍കുട്ടി ബ്ലോക്ക് ചെയ്തതില്‍ പ്രകോപിതനായായിരുന്നു ഇയാളുടെ പ്രവൃത്തി.
ചൊവ്വാഴ്ച വൈകിട്ടായിരുന്നു സംഭവം. സ്‌കൂട്ടറിലെത്തിയ ഫിറോസ് കത്തിക്കൊണ്ട് വെട്ടിപ്പരിക്കേല്‍പ്പിക്കുകയായിരുന്നു. ഗുരുതരമായി പരിക്കേറ്റ പെണ്‍കുട്ടിയെ തൃശൂര്‍ മെഡിക്കല്‍ കോളേജില്‍ പ്രവേശിപ്പിച്ചു.
തലയിലും കഴുത്തിലും ഇടത്തെ കൈയിലും തോളിലും കാല്‍വിരലുഖകളിലുമാണ് വെട്ടേറ്റത്. കൈ അറ്റുത്തൂങ്ങിയതായും കഴുത്തില്‍ മുറിവേറ്റതായും ആശുപത്രി അധികൃതര്‍ പറഞ്ഞു.
കഴിഞ്ഞവര്‍ഷം പാലപ്പുറം അഴിക്കലപ്പറമ്പില്‍ സുഹൃത്തായ യുവാവിനെ കൊന്ന് കുഴിച്ചുമൂടിയ കേസിലെ പ്രതിയാണ് ഫിറോസ്.
ഫിറോസിനെ സംഭവസ്ഥലത്തുവെച്ചുതന്നെ പോലീസ് കസ്റ്റഡിയിലെടുത്തു. ഇയാള്‍ക്കെതിരേ വധശ്രമത്തിന് പോലീസ് കേസെടുത്തു.
