ആളില്ലാത്ത വീട്ടില്‍ മോഷ്ടിക്കാന്‍ കയറിയ കള്ളന് ഫ്രിഡ്ജിലിരുന്ന അണ്ടിപ്പരിപ്പ് അകത്താക്കിയ ശേഷം മടങ്ങി.
പോകുന്നതിനു മുമ്പ് ഷേവ് ചെയ്ത് ഒന്നു സുന്ദരനാകുകയും ചെയ്തു. വൈക്കത്താണ് സംഭവം. സംഭവത്തിന്റെ ദൃശ്യങ്ങള്‍ സിസിടിവിയില്‍ പതിഞ്ഞിട്ടുണ്ട്.
വീട് കുത്തിത്തുറന്നാണ് കള്ളന് അകത്ത് പ്രവേശിച്ചത്. കയ്യില്‍ കൊച്ചു മണ്‍വെട്ടിയുമായാണ് ഇയാള്‍ എത്തിയത്.
വാതില്‍ കുത്തിത്തുറന്ന് വീടിനുള്ളില്‍ പ്രവേശിച്ചെങ്കിലും മോഷ്ടിക്കാന്‍ പാകത്തിന് ഒന്നും തന്നെ കള്ളന് ലഭിച്ചില്ല.
ഫ്രിഡ്ജിലിരുന്ന കശുവണ്ടി കട്ടിലില്‍ കൊണ്ടു വച്ചു കഴിച്ചതിന്റെ ലക്ഷണമുണ്ട്. മുറിയിലാകെ രോമം പടര്‍ന്ന് കിടന്നതാണ് കള്ളന് ഷേവ് ചെയ്തശേഷമാണ് മടങ്ങിയതെന്ന അനുമാനത്തില്‍ പോലീസെത്താന്‍ കാരണം.
മുറിയില്‍ തുണികളെല്ലാം വലിച്ചുവാരിയിട്ടിരിക്കുകയായിരുന്നു. സമീപത്തുള്ള വീടിന് ചുറ്റും കള്ളന് കറങ്ങുന്നതിന്റെ ദൃശ്യങ്ങളാണ് പോലീസിന് ലഭിച്ചത്.
എന്നാല്‍ ഈ വീട്ടില്‍ മോഷണത്തിനായി കയറിയില്ല. എന്നാല്‍ ഈ വീടിന്റെ പുറത്തുണ്ടായിരുന്ന ചില സാധനങ്ങള്‍ കളവ് പോയിട്ടുണ്ട്.
