ചെന്നൈ: മദ്യലഹരിയില്‍ ട്രാന്‍സ്‌ഫോമറില്‍ കയറി ഹൈടെന്‍ഷന്‍ കമ്പിയില്‍ കടിച്ച യുവാവിന് ഗുരുതരമായി പൊള്ളലേറ്റു. തമിഴ്‌നാട്ടിലെ തിരുവള്ളൂര്‍ ജില്ലയിലാണ് സംഭവം.
ചിന്നമങ്കോട് സ്വദേശി ധര്‍മ്മദുരൈക്കാണ്(33) പൊള്ളലേറ്റത്. ഗുരുതരമായി പൊള്ളലേറ്റ ഇയാളെ ആശുപത്രിയിലേക്ക് മാറ്റി.
കുടുംബപ്രശ്‌നങ്ങളെതുടര്‍ന്ന് ഭാര്യ പിണങ്ങിപ്പോയതില്‍ ഇയാള്‍ അസ്വസ്ഥനായിരുന്നു. ഇയാള്‍ ഭാര്യാഗൃഹത്തിലെത്തി വിളിച്ചിട്ടും ഇവര്‍ കൂടെ പോരാന്‍ തയാറായില്ല.
തുടര്‍ന്ന് ഭാര്യാസഹോദരന്‍മാര്‍ക്കെതിരെ പരാതി നല്‍കാന്‍ ഇയാള്‍ ധര്‍മ്മദുരൈ പോലീസ് സ്‌റ്റേഷനിലെത്തി.
അല്‍പസമയം കാത്തിരിക്കാന്‍ പോലീസുകാര്‍ ആവശ്യപ്പെട്ടതോടെ ഇയാള്‍ സ്‌റ്റേഷന്‍ വളപ്പില്‍നിന്ന് ഇറങ്ങി സമീപത്തുള്ള ട്രാന്‍സ്‌ഫോമറില്‍ കയറി.
മദ്യലഹരിയിലായിരുന്ന ഇയാള്‍ ഹൈടെന്‍ഷന്‍ വയറില്‍ കടിക്കുകയായിരുന്നെന്നും പോലീസുകാര്‍ പറഞ്ഞു.
സംഭവത്തിന്‍റെ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്.
