ഹരിപ്പാട്: കൈക്കൂലി വാങ്ങുന്നതിനിടയിൽ അസി. മോട്ടോർ വെഹിക്കിൾ ഇൻസ്പെക്ടറെ വിജിലൻസ് സംഘം അറസ്റ്റ് ചെയ്തു.
അമ്പലപ്പുഴ എൻഫോഴ്സ്മെന്‍റ് സ്ക്വാഡിലെ അസി. മോട്ടോർ വെഹിക്കിൾ ഇൻസ്പെക്ടർ എസ്. സതീഷി (37)യാണ് ഹരിപ്പാട് മാധവ ജംഗ്ഷന് സമീപം ഇന്നലെ വൈകുന്നേരം ആറിന് വിജിലൻസ് പിടികൂടിയത്.
ദേശീയപാത നിർമാണത്തിന്‍റെ ഉപകരാറുകാരനിൽനിന്ന് 25,000 രൂപ വാങ്ങവേയാണ് പിടിയിലായത്. ഒരു മാസത്തേക്ക് ഇയാളുടെ വാഹനം പിടികൂടാതിരിക്കാനായിരുന്നു കൈക്കൂലി.
കഴിഞ്ഞ ദിവസം കരാറുകാരന്‍റെ രണ്ട് വാഹനങ്ങൾ പിടികൂടി 20,000 രൂപ പിഴയിട്ടിരുന്നു. ഇതിനു ശേഷമാണ് കൈക്കൂലി ചോദിച്ചത്.
