ഷാർജ: അജ്മാനിൽ 30 നിലകളുള്ള ഫ്ലാറ്റ് സമുച്ചയത്തിൽ തീപിടിത്തം. മലയാളികളടക്കം നൂറുകണക്കിന് കുടുംബങ്ങളെ കെട്ടിടത്തിൽ നിന്ന് ഒഴിപ്പിച്ചു. ആളപായമുള്ളതായി റിപ്പോർട്ടില്ല.
ഷാര്‍ജ അജ്മാന്‍ അതിര്‍ത്തിയിലെ റുമൈലക്ക് സമീപം ബാങ്ക് സ്ട്രീറ്റിലെ അജ്മാൻ വൺ ടവേഴ്സ് എന്ന ഫ്ലാറ്റ് സമുച്ചയത്തിലാണ് അപകടമുണ്ടായത്.
തിങ്കളാഴ്ച രാത്രി പന്ത്രണ്ടോടെ സമുച്ചയത്തിലെ രണ്ടാം നമ്പർ ടവറിലാണ് തീപിടിത്തുണ്ടായത്. ഒരു മണിക്കൂറിനകം കെട്ടിടത്തിൽ താമസിക്കുന്നവരെ പൂർണമായും ഒഴിപ്പിച്ചു.
12 ടവറുകളിലായി 3000 അപ്പാര്‍ട്‌മെന്‍റുകള്‍ ഉള്‍പ്പെടുന്നതാണ് അജ്മാന്‍വണ്‍ കോംപ്ലക്‌സ്. ഇതില്‍ ടവര്‍ ഒന്നില്‍ വലിയ നാശനഷ്ടമുണ്ടായതായി അധികൃതര്‍ സ്ഥിരീകരിച്ചു.
യുഎഇ ആഭ്യന്തര മന്ത്രി ശൈഖ് സൈഫ് ബിന്‍ സായിദ് ആല്‍ നഹ് യാന്‍ സംഭവസ്ഥലം സന്ദര്‍ശിച്ച് സ്ഥിതിഗതികള്‍ വിലയിരുത്തി.
സമീപത്തെ മറ്റു കെട്ടിടങ്ങളിലേക്ക് പടരും മുമ്പ് തീ നിയന്ത്രണവിധേയമാക്കാൻ സാധിച്ചതായി അധികൃതർ പറഞ്ഞു. തീപിടിത്തത്തിന്‍റെ കാരണം സംബന്ധിച്ച് അന്വേഷണം പുരോഗമിക്കുകയാണ്.
