ആറന്മുള: മദ്യപിച്ചു ബഹളം ഉണ്ടാക്കിയെന്ന പേരില്‍ ജില്ല ആശുപത്രിയില്‍നിന്നു പിടിച്ചുകൊണ്ടുവന്നയാള്‍ എസ്‌ഐയെ തള്ളിതാഴെയിട്ടു.
ആറന്മുള എസ്ഐ സാജു പി. ജോര്‍ജിന്‍റെ കൈ ഒടിഞ്ഞു. സംഭവത്തില്‍ കാഞ്ഞിരവേലി സ്വദേശി അഭിലാഷ് കസ്റ്റഡിയിലായി.
കഴിഞ്ഞദിവസം രാത്രി കോഴഞ്ചേരിയിലെ ജില്ലാ ആശുപത്രിയില്‍ ബഹളം വയ്ക്കുന്നതായി പരാതി ലഭിച്ചതിനെത്തുടര്‍ന്നാണ് ഡ്യുട്ടിയിലുണ്ടായിരുന്ന സാജു പി ജോര്‍ജ് ആശുപത്രിയിലെത്തി ഇയാളെ കസ്റ്റഡിയിലെടുത്തത്.
ആറന്മുള പോലീസ് റ്റേഷന്‍ കെട്ടിടത്തിന്‍റെ രണ്ടാമത്തെ നിലയിലാണ് പോലീസ് റ്റേഷന്‍ പ്രവര്‍ത്തിക്കുന്നത്. താഴത്തെ നിലയില്‍ നിന്നും അഭിലാഷുമായി പടി കയറുന്നതിനിടെ എസ്ഐ സാജുവിനെ ആക്രമിക്കുകയായിരുന്നുവെന്ന് പറയുന്നു. എസ്‌ഐയെ ഇയാള്‍ പിടിച്ചുതള്ളി.
താഴെ വീണപ്പോള്‍ കൈക്ക് ഒടിവുണ്ടായി. ഉടന്‍ തന്നെ മറ്റ്‌പോലീസുകാര്‍ അഭിലാഷിനെ കീഴടക്കി. ജില്ലാ ആശുപത്രിയില്‍ പ്രവേശിപ്പിച്ച സാജു പി ജോര്‍ജിന് കൈയില്‍ സ്റ്റീല്‍ റോഡ് ഇടുന്നതിനായി ശസ്ത്രക്രിയ വേണ്ടിവരുമെന്ന് ഡോക്ടര്‍മാര്‍ പറഞ്ഞു.
