ന്യൂഡൽഹി: സോഷ്യല്‍ മീഡിയയില്‍ വൈറലാകാന്‍ എന്തും കാണിക്കാന്‍ മടിയില്ലാത്ത ചിലരുണ്ട്. പലപ്പോഴും സാഹസങ്ങള്‍ ജീവന്‍ വരെ അപഹരിക്കാറുണ്ട്.
കര്‍ണാടകയില്‍ വെള്ളച്ചാട്ടത്തിനരികില്‍ വീഡിയോ ഷൂട്ട് ചെയ്യവെ യുവാവ് ഒഴുക്കില്‍പ്പെട്ടു മരിച്ചതു കഴിഞ്ഞദിവസമാണ്.
സംഭവത്തിന്‍റെ വീഡിയോ ആളുകള്‍ക്കിടയില്‍ വലിയ ഞെട്ടലുണ്ടാക്കുകയും ചെയ്തു. ഇത്തരത്തില്‍ നിരവധി സംഭവങ്ങള്‍ വാര്‍ത്തയാകാറുണ്ട്.
കഴിഞ്ഞദിവസം റെയില്‍വേ ട്രാക്കില്‍ റീല്‍സ് ഷൂട്ട് ചെയ്ത അമ്മയ്ക്കും മകള്‍ക്കും കിട്ടിയത് പോലീസിന്‍റെ വക എട്ടിന്‍റെ പണിയാണ്.
ആഗ്ര ഫോര്‍ട്ട് റെയില്‍വേ സ്‌റ്റേഷനിലാണ് സംഭവം. അബ് തേരേ ബിന്‍ ഹം ഭീ ജീ ലെംഗേ… എന്ന ഗാനം ആലപിച്ച് പാളത്തിലൂടെ യുവതി നടന്നുനീങ്ങുന്നതാണ് വീഡിയോയിലുള്ളത്.
ട്രാക്കിലൂടെ പതിയെ നടന്നു മുട്ടുകുത്തുന്നതും വീഡിയോയില്‍ കാണാം. സോഷ്യൽ മീഡിയയിൽ പങ്കുവച്ച വീഡിയോ വൈറലായതിനു പിന്നാലെ പോലീസ് ഇവരെ അറസ്റ്റ് ചെയ്യുകയായിരുന്നു.
യുട്യൂബര്‍ മീന സിംഗ് എന്ന യുവതിയുടെതാണ് വീഡിയോ. യുട്യൂബില്‍ അമ്പതിനായിരത്തിനടുത്ത് സബ്‌സ്‌ക്രൈബേഴ്‌സ് ഇവര്‍ക്കുണ്ട്.
ട്രാക്കില്‍ നിന്നുള്ള വീഡിയോയ്‌ക്കൊപ്പം, റെയില്‍വേ പരിസരത്ത് നിന്നുള്ള വീഡിയോകളും മീനയുടെ യുട്യൂബ് ചാനലില്‍ അപ്‌ലോഡ് ചെയ്തിട്ടുണ്ട്.
