പ്രമുഖ നടി ഇല്യാന ഡിക്രൂസിന് ആണ്‍കുഞ്ഞ് പിറന്നു. താരം തന്നെയാണ് സോഷ്യല്‍ മീഡിയയിലൂടെ സന്തോഷവാര്‍ത്ത പുറത്തുവിട്ടത്.
‘കോവ ഫീനിക്‌സ് ഡോളന്‍’ എന്നാണ് കുട്ടിയുടെ പേര്. മകന്റെ ചിത്രവും നടി പങ്കുവെച്ചിട്ടുണ്ട്. ബോളിവുഡിലും തെന്നിന്ത്യയിലും ശ്രദ്ധേയമായ താരമാണ് ഇല്യാന ഡിക്രൂസ്.
ഓഗസ്റ്റ് ഒന്നിനാണ് കുഞ്ഞിന്റെ ജന്മദിനം. അമ്മയായ ഇല്യാനയ്ക്ക് ആശംസാപ്രവാഹവുമായി ആരാധകരും സഹതാരങ്ങളുമെത്തി.
അഥിത ഷെട്ടി, ഹുമ ഖുറേഷി, നര്‍ഗീസ് ഫക്രി, അര്‍ജുന്‍ കപൂര്‍ തുടങ്ങിയ താരങ്ങളെല്ലാം ആശംസകള്‍ അറിയിച്ചുകൊണ്ട് എത്തി.
ഇല്യാനയുടെ മകന്റെ പേരിന്റെ അര്‍ഥം തിരയുകയാണ് ആരാധകരിപ്പോള്‍. ‘യോദ്ധാവ്’ ,’ധീരന്‍’ എന്നിങ്ങനെയാണ് പേരിന്റെ അര്‍ഥമെന്ന് ബംപ് ഡോട്ട് കോമിലെ വിവരങ്ങളെ അടിസ്ഥാനമാക്കി ആരാധകര്‍ അഭിപ്രായപ്പെടുന്നുണ്ട്.
ഇക്കാര്യത്തില്‍ താരത്തിന്റെ വാക്കുകള്‍ക്കായി കാത്തിരിക്കുകയാണ് ഇവരെല്ലാം.
സോഷ്യല്‍ മീഡിയയില്‍ സജീവമാണെങ്കിലും വ്യക്തിജീവിതത്തെക്കുറിച്ച് അധികമൊന്നും വെളിപ്പെടുത്താന്‍ ആഗ്രഹിക്കാത്ത താരമാണ് ഇല്യാന.
അടുത്തിടെയാണ് തന്റെ കാമുകന്റെ മുഖം വ്യക്തമാക്കാത്ത ഒരു ചിത്രം താരം പങ്കുവെച്ചത്.
