കൊച്ചി: ഫ്ളാറ്റില്‍നിന്നും വജ്രാഭരണങ്ങളും സ്വര്‍ണാഭരണങ്ങളും മോഷ്ടിച്ച കേസില്‍ അറസ്റ്റിലായ ജാര്‍ഖണ്ഡ് സ്വദേശിനികള്‍ സമാനരീതിയില്‍ തട്ടിപ്പു നടത്തിയിട്ടുണ്ടോയെന്ന് പോലീസ് അന്വേഷണം ആരംഭിച്ചു.
കേസുമായി ബന്ധപ്പെട്ട് ജാര്‍ഖണ്ഡ് റാഞ്ചി സ്വദേശിനി അഞ്ജന കിന്‍ഡോ (19), ഗുംല ഭഗിട്ടോലി സ്വദേശിനി അമിഷ കുജൂര്‍ (21) എന്നിവരെയാണ് പാലാരിവട്ടം പോലീസ് പിടികൂടിയത്.
കാരണക്കോണം സ്‌റ്റേഡിയം ലിങ്ക് റോഡിലെ സ്‌കൈലന്‍ഡ് ഫ്ളാറ്റില്‍നിന്നും രാജസ്ഥാന്‍ സ്വദേശിനിയുടെ അലമാരയില്‍ സൂക്ഷിച്ചിരുന്ന രണ്ട് ലക്ഷത്തി അമ്പതിനായിരം രൂപ വില വരുന്ന വജ്രാഭരണങ്ങളും സ്വര്‍ണാഭരണങ്ങളുമാണ് പ്രതികള്‍ മോഷ്ടിച്ചത്.
കഴിഞ്ഞ 22 നാണ് കേസിനാസ്പദമായ സംഭവം. ഏജന്‍റ് മുഖേന വീട്ടുജോലിക്കായി വന്ന അഞ്ജന വീട്ടുകാര്‍ പുറത്തു പോയ സമയത്ത് മുറിയില്‍ ഒളിച്ചിരുന്ന് ആഭരണങ്ങളും പണവും മോഷ്ടിക്കുകയായിരുന്നു.
പിന്നീട് കൂട്ടുകാരി അമിഷയെ വിളിച്ച് വരുത്തി മോഷണ വസ്തുക്കളുമായി ഫ്ളാറ്റില്‍ നിന്നും കടന്നു കളഞ്ഞു. വീട്ടുകാര്‍ നല്‍കിയ പരാതിയില്‍ അന്വേഷണം നടത്തിയ പാലാരിവട്ടം പോലീസ് പ്രതികള്‍ ആലുവ ഭാഗത്ത് എത്തിയതായി അറിഞ്ഞു.
ഇവിടെയെത്തിയ പോലീസ് സംഘം ആലുവ റെയില്‍വേ സ്‌റ്റേഷനില്‍നിന്നും പ്രതികളെ അറസ്റ്റ് ചെയ്യുകയായിരുന്നു. മോഷണ മുതലുകളുമായി പ്രതികള്‍ ജാര്‍ഖണ്ഡിലേക്ക് കടന്നുകളയാനിരുന്ന ശ്രമമാണ് പോലീസ് പൊളിച്ചത്.
