രാത്രികാലങ്ങളിൽ ആരും കാ‌ണാതെ വീടുകളിലെത്തി ഒളിച്ചിരുന്ന് ഒളിഞ്ഞു നോക്കുന്ന യുവാവിനെ നാട്ടുകാർ പിടികൂടി പൊലീസിൽ ഏല്പിച്ചു.
കിഴക്കോത്ത് പന്നൂർ മേലെ പറയരുകണ്ടി മുഹമ്മദ് സാദിഖ് (34) ആണ് പിടിയിലായത്. വീടുകളിൽ അശ്ലീലമെഴുതി‌യ കുറിപ്പ് കൊണ്ടിടുന്നതും ഇയാളുടെ പതിവ് പരിപാടിയാണ്.
രാത്രിയിൽ വീടിനുള്ളിൽ ഒളിച്ച് കടന്ന് ഇയാൾ സ്ത്രീകളുടെ ഫോട്ടോ എടുക്കുകയും വീഡിയോ പകർത്തുകയുമാണ് ചെയ്തിരുന്നത്.
സ്ത്രീകൾ കുളിക്കുന്നതുൾപ്പെടെ നിരവധി ഫോട്ടോകളാണ് ഇയാളുടെ ഫോണിൽ നിന്ന് കണ്ടെടുത്തെന്നും പൊലീസ് പറഞ്ഞു. ഇയാൾ രാത്രിയിൽ പുതപ്പുകൊണ്ട് മൂടിപ്പുതച്ചാണ് വീടുകളിൽ കയറുന്നത്.
നാട്ടുകാർ സിസിടിവി പരിശോധിച്ചപ്പോഴാണ് ആളെക്കുറിച്ച് വിവരം ലഭിക്കുന്നത്. രാത്രിയിൽ മൂടിപ്പുതച്ച് സമീപത്തെ ഒരു വീട്ടിൽ കയറാൻ ശ്രമിച്ച ഇയാളെ നാട്ടുകാർ പിടികൂടാൻ ശ്രമം നടത്തിയെങ്കിലും ഇയാൾ ഓടി രക്ഷപെട്ടു.
സംശയം തോന്നിയ നാട്ടുകാർ ഇയാളുടെ വീട്ടിൽ എത്തി. പക്ഷേ സാദിഖിനെ അവിടെ കണ്ടില്ല. ഫോണിൽ വിളിച്ച് നോക്കിയപ്പോൾ ഫോൺ ഓഫ് ആയിരുന്നു.
തിരച്ചിലിനൊടുവിൽ നാട്ടുകാർ ഇയാളെ പിടികൂടി കൊടുവള്ളി പൊലീസിൽ ഏല്പിച്ചു. താമരശ്ശേരി കോടതിയിൽ ഹാജരാക്കിയ പ്രതിയെ റിമാന്‍റ് ചെയ്തു.
