ചില വാർത്തകൾ വായിക്കുമ്പോൾ തന്നെ കണ്ണും മനസും നിറയാറുണ്ട്. അത്തരത്തിലൊരു വാർത്തയാണ് തദ്ദേശ സ്വയംഭരണ വകുപ്പ് മന്ത്രി എം.ബി.രാജേഷ് ഫേസ്ബുക്കിൽ പങ്കുവെച്ചത്.
മുൻ വിദ്യാഭ്യാസ വകുപ്പ് മന്ത്രി പ്രൊഫ. സി രവീന്ദ്രനാഥിന്‍റെ പിതാവ് പാലിയക്കര പീതാംബരൻ കർത്താ അന്തരിച്ചത്‌ കഴിഞ്ഞ ദിവസമാണ്.
പിതാവിന്‍റെ മരണശേഷം അദ്ദേഹത്തോടുള്ള സ്മരണാർഥം നെന്മണിക്കര പഞ്ചായത്ത്‌ പരിധിയിലെ 14 കുടുംബങ്ങൾക്ക് ഒരു വർഷത്തെ ഭക്ഷണം നൽകാൻ മക്കൾ തീരുമാനിച്ചു. പുതുക്കാട് പെയിൻ ആൻഡ് പാലിയേറ്റീവ് സെന്‍ററിന് 5 ഓക്സിജൻ സിലിണ്ടർ ലഭ്യമാക്കുന്നതിനായി 25000 രൂപയും നൽകി.
സർക്കാരിന്‍റെ അതിദരിദ്രരുടെ പട്ടികയിൽ ഉൾപ്പെട്ട പഞ്ചായത്ത്‌ ആണ് നെന്മണിക്കര. അച്ഛന്‍റെ ഓർമ്മയ്‌ക്കായി മക്കൾ കാട്ടിയ ഈ വലിയ നന്മയ്ക്ക്‌ ബിഗ്‌ സല്യൂട്ട്‌ എന്ന കുറിപ്പോടെയാണ് ഈ സന്തോഷ വാർത്ത എം.ബി.രാജേഷ് ഫേസ്ബുക്കിൽ പങ്കുവെച്ചത്.
എം.ബി.രാജേഷിന്‍റെ ഫേസ്ബുക്ക് പോസ്റ്റ്…
അച്ഛന്‍റെ ഓർമ്മയ്‌ക്കായി മക്കൾ കാട്ടിയ ഈ വലിയ നന്മയ്ക്ക്‌ ബിഗ്‌ സല്യൂട്ട്‌. അച്ഛന്‍റെ സ്മരണാർത്ഥം പഞ്ചായത്തിലെ എല്ലാ അതിദരിദ്രർക്കും ഒരു വർഷം ഭക്ഷണം നൽകാനാണ്‌ മക്കൾ തീരുമാനിച്ചിരിക്കുന്നത്‌.
രണ്ടാഴ്ച മുൻപാണ്‌ റിട്ടയേർഡ്‌ അധ്യാപകനായ പാലിയക്കര പീതാംബരൻ കർത്താ അന്തരിച്ചത്‌. സർക്കാരിന്‍റെ അതിദരിദ്രരുടെ പട്ടികയിൽ ഉൾപ്പെട്ട നെന്മണിക്കര പഞ്ചായത്ത്‌ പരിധിയിലെ 14 കുടുംബങ്ങൾക്കാണ്‌ ഒരു വർഷത്തെ ഭക്ഷണം നൽകുന്നത്‌.
മക്കളായ മുൻ വിദ്യാഭ്യാസ വകുപ്പ് മന്ത്രി പ്രൊഫ. സി രവീന്ദ്രനാഥ്, ശ്രീപാർവ്വതി, ജയശ്രീ, മുകുന്ദനുണ്ണി എന്നിവർ ചേർന്നാണ്‌ ഈ തീരുമാനമെടുത്തത്‌.
ഇവരെ സംസ്ഥാന സർക്കാരിന്‌ വേണ്ടി ഹൃദയപൂർവ്വം അഭിവാദ്യം ചെയ്യുകയാണ്‌. നാട്ടിലെ വയറെരിയുന്നവരുടെ വിശപ്പടക്കുന്നതാണ്‌ മരണാനന്തരം അച്ഛനുള്ള സ്നേഹസമ്മാനമെന്ന ഈ തീരുമാനം അനുകരണീയവും അഭിനന്ദനാർഹവുമാണ്‌.
ഭക്ഷണം നൽകാൻ ആവശ്യമായി കണക്കാക്കിയ തുക പഞ്ചായത്ത്‌ പ്രസിഡന്റ്‌ ടി എസ്‌ ബൈജു ഏറ്റുവാങ്ങി.
പുതുക്കാട് പെയിൻ ആൻഡ് പാലിയേറ്റീവ് സെന്‍ററിന് 5 ഓക്സിജൻ സിലിണ്ടർ ലഭ്യമാക്കുന്നതിനായി 25000 രൂപയും നൽകിയിട്ടുണ്ട്‌.
ചിററ്റിശ്ശേരി ദയ സദനിലെ അന്തേവാസികൾക്ക് ഭക്ഷണത്തിനും വസ്ത്രത്തിനുമായി 10,000 രൂപയും കൈമാറി.
പന്തല്ലൂർ ജനത യുപി സ്കൂളിൽ മികച്ച വിജയം നേടുന്ന കുട്ടികൾക്ക് സ്കോളർഷിപ്പ് ഏപ്പെടുത്തുന്നതിനായി 50,000 രൂപയാണ്‌ നൽകിയത്‌. പ്രൊഫ. സി രവീന്ദ്രനാഥ് ഉൾപ്പെടെയുള്ളവർക്ക്‌ ഒരിക്കൽക്കൂടി അഭിനന്ദനങ്ങൾ. ഫേസ്ബുക്ക് പോസ്റ്റിന്‍റെ പൂർണ രൂപം.
