വിഖ്യാത ഇറാനിയൻ ചലച്ചിത്ര സംവിധായകൻ മെർജൂയിയും ഭാര്യയും കൊല്ലപ്പെട്ട നിലയിൽ. വീട്ടിൽ നിന്ന് കുത്തി കൊലപ്പെടുത്തിയ നിലയിലായിരുന്നു ഇരുവരെയും കണ്ടെത്തിയതെന്ന് ഔദ്യോഗിക വാര്‍ത്ത ഏജന്‍സി റിപ്പോർട്ട് ചെയ്തു.
കഴുത്തിലാണ് രണ്ടു പേർക്കും കുത്തേറ്റത് എന്നാണ് ഐആർഎൻഎ റിപ്പോർട്ട്. ഇന്നലെ രാത്രി കുടുംബത്തെ സന്ദര്‍ശിക്കാന്‍ എത്തിയ ദാരിയൂഷ് മെർജൂയിയുടെ മകള്‍ മോണ മെർജൂയിയാണ് ഇവര്‍ കൊല്ലപ്പെട്ടത് ആദ്യം കണ്ടത്. ഇവർ ഉടനെ പൊലീസിനെ വിവരം അറിയിക്കുകയായിരുന്നു
മെർജൂയിയുടെ ഭാര്യ വഹിദെ മുഹമ്മദീഫറി തങ്ങൾക്ക് ഭീഷണിയുണ്ടെന്ന്ഏ താനും നാളുകൾക്ക് മുൻപ് സോഷ്യല്‍ മീഡിയയിലൂടെ പ്രതികരിച്ചിരുന്നു. പൊലീസ് അന്വേഷണം അരംഭിച്ചു. കൊലപാതകത്തിലേക്ക് നയിച്ച കാരണം ഇനിയും വ്യക്തമല്ല.
1970 കളുടെ തുടക്കത്തിൽ ഇറാനിലെ നവതരംഗ സിനിമ പ്രസ്ഥാനത്തിൽ പ്രധാന പങ്കുവഹിച്ച സംവിധായകനാണ് മെർജൂയി. 1998 ലെ ചിക്കാഗോ ഇന്റർനാഷണൽ ഫിലിം ഫെസ്റ്റിവലിൽ നിന്ന് സിൽവർ ഹ്യൂഗോയും 1993 ലെ സാൻ സെബാസ്റ്റ്യൻ ഇന്റർനാഷണൽ ഫിലിം ഫെസ്റ്റിവലിൽ ഗോൾഡൻ സീഷെലും ഉൾപ്പെടെ നിരവധി അവാർഡുകൾ ലഭിച്ചിട്ടുണ്ട്.
