ന്യൂഡൽഹി: ദീപാവലിക്ക് ശേഷം ഡൽഹി-എൻ‌സി‌ആറിന്‍റെ വായുവിന്‍റെ ഗുണനിലവാരം ഗണ്യമായി മോശമായതായി കേന്ദ്ര മലിനീകരണ നിയന്ത്രണ ബോർഡ് (സി‌പി‌സി‌ബി) അറിയിച്ചു. ദീപാവലി രാത്രിയിൽ പടക്കം പൊട്ടിച്ചതിനെ തുടർന്ന് നഗരം കനത്ത പുകമഞ്ഞിൽ മുങ്ങിയതിനെ തുടർന്നാണിത്.
എഎപി സർക്കാരിന്‍റെ സമ്പൂർണ പടക്ക നിരോധനവും ‘ദിയാ ജലാവോ, പതാഖേ നഹി’ പ്രചാരണവും ഉണ്ടായിരുന്നിട്ടും ലോധി റോഡ്, ആർകെ പുരം, കരോൾ ബാഗ്, പഞ്ചാബി ബാഗ് എന്നിവയുൾപ്പെടെ ഡൽഹിയുടെ വിവിധ ഭാഗങ്ങളിൽ ആകാശത്ത് കരിമരുന്ന് പ്രയോഗം നടത്തി.
കേന്ദ്ര മലിനീകരണ നിയന്ത്രണ ബോർഡിന്‍റെ കണക്കുകൾ പ്രകാരം ഡൽഹിയിൽ കഴിഞ്ഞ വർഷം ദീപാവലി ദിനത്തിൽ 312, 2021ൽ 382, 2020ൽ 414, 2019ൽ 337, 2018ൽ 281, 2017ൽ 319, 2016ൽ 431 എന്നിങ്ങനെയാണ് എക്യുഐ രേഖപ്പെടുത്തിയത്. നവംബർ 12 ന് സിപിസിബിയിൽ നിന്നുള്ള കണക്കുകൾ പ്രകാരം ആനന്ദ് വിഹാറിലെ എക്യുഐ 266 ആയിരുന്നു. ആർകെ പുരത്ത് ഞായറാഴ്ച രാവിലെ 07.00 ന് 241 ആയിരുന്നു. അതുപോലെ, പഞ്ചാബി ബാഗ് ഏരിയയിൽ ഇത് 233, ഐടിഒ ഏരിയയിൽ ഇത് 227 ആയി രേഖപ്പെടുത്തി.
ഈ ഞായറാഴ്ച ദീപാവലി വേളയിൽ ഇന്ത്യയിലുടനീളം നിരവധി തീപിടിത്തവുമായി ബന്ധപ്പെട്ട സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. എന്നാൽ ഈ സംഭവങ്ങളിൽ ഇതുവരെ ആളപായമൊന്നും റിപ്പോർട്ട് ചെയ്തിട്ടില്ല. ദേശീയ തലസ്ഥാനത്ത് ഉത്സവ ആഘോഷങ്ങൾക്കിടയിൽ തിലക് നഗർ ഏരിയയിലെ ഒരു മാർക്കറ്റിൽ വൻ തീപിടിത്തം ഉണ്ടായി.
ഉടൻ തന്നെ രണ്ട് അഗ്നിശമന സേനാ യൂണിറ്റുകൾ സ്ഥലത്തെത്തി തീ നിയന്ത്രണ വിധേയമാക്കി. ജനത്തിരക്കേറിയ സ്ഥലത്താണ് സംഭവം നടന്നതെങ്കിലും സംഭവത്തിൽ ആർക്കും പരിക്കില്ല. ഞായറാഴ്ച ദീപാവലി ആഘോഷങ്ങൾക്കിടെ ഡൽഹി ഫയർ സർവീസസിന് തീപിടിത്തവുമായി ബന്ധപ്പെട്ട നൂറിലധികം കോളുകളാണ് ലഭിച്ചത്.
കഴിഞ്ഞ ഏതാനും ആഴ്ചകളായി ദേശീയ തലസ്ഥാനം മലിനീകരണത്താൽ പൊറുതിമുട്ടുകയാണ്. പലയിടത്തും എക്യുഐ ‘തീവ്രമായ’ വിഭാഗത്തിൽ ഉയർന്നു, ദിവസങ്ങളോളം വിഷലിപ്തമായി തുടർന്നു. അരവിന്ദ് കെജ്‌രിവാളിന്‍റെ നേതൃത്വത്തിലുള്ള എഎപി സർക്കാർ അടുത്തിടെ പടക്കം പൊട്ടിക്കുന്നതിന് സമ്പൂർണ നിരോധനം ഏർപ്പെടുത്തിയിരുന്നു. മലിനീകരണ സാഹചര്യത്തിന്‍റെ പശ്ചാത്തലത്തിൽ നഗരത്തിലെ ദുർഗന്ധത്തെ നേരിടാൻ ‘കൃത്രിമ മഴ’ എന്ന ആശയം പോലും സർക്കാർ പരിഗണിച്ചു.
