കോട്ടയം: വയോധികയെ ആക്രമിച്ച് സ്വര്‍ണം കവര്‍ന്ന കേസില്‍ നാലുപേരെ പോലീസ് അറസ്റ്റ് ചെയ്തു. തോട്ടപുഴശേരി മാരാമണ്‍ ഭാഗത്ത് പാറയില്‍ കണ്ടത്തില്‍ അനില്‍കുമാര്‍ (38), കൊല്ലം പെരുനാട് കൊച്ചടിയത്ത് പനയില്‍ ശശി (കാവനാട് ശശി-51), തിരുവല്ല പൂമംഗലം ശരത് (38), ആറന്മുള പറപ്പാട്ടുകരയില്‍ ഉല്ലാസ് (40) എന്നിവരെയാണ് ചിങ്ങവനം പോലീസ് അറസ്റ്റ് ചെയ്തത്.
അനില്‍കുമാറും ശശിയും ചേര്‍ന്ന് ബൈക്കില്‍ 18നു രാവിലെ ആറിനു പരുത്തുംപാറ ഭാഗത്തുവച്ച് പ്രഭാത നടത്തത്തിന് ഇറങ്ങിയ വയോധികയെ ആക്രമിച്ച് കഴുത്തില്‍ കിടന്നിരുന്ന മൂന്നു പവന്‍റെ മാല പൊട്ടിച്ചു കടന്നുകളയുകയായിരുന്നു.
ഇവരുടെ ആക്രമണത്തില്‍ വയോധികയ്ക്കു സാരമായ പരിക്കേല്‍ക്കുകയും ചെയ്തു.
അനില്‍കുമാറും ശശിയും ചേര്‍ന്ന് കവര്‍ന്ന മാല വില്‍ക്കാന്‍ സഹായിച്ചതിനാണ് ശരത്തിനെ പോലീസ് പിടികൂടിയത്. കൂടാതെ ഇവര്‍ക്ക് മോഷണത്തിനു വേണ്ട വാഹനം കൊടുത്തത് ഉല്ലാസ് ആണെന്ന് കണ്ടെത്തിയതോടെ ഇയാളെയും പോലീസ് അറസ്റ്റ് ചെയ്തു. തുടര്‍ന്ന് ഇവര്‍ വിൽപ്പന നടത്തിയ മാല പോലീസ് കണ്ടെടുത്തു.
ശശിക്ക് ആലപ്പുഴ, കോട്ടയം, തൃശൂർ, മലപ്പുറം, തിരുവനന്തപുരം, പാലക്കാട് എന്നീ ജില്ലകളിലായി നിരവധി ക്രിമിനല്‍ കേസുകളുണ്ട്. ശരത്തിന് തിരുവല്ല, കാഞ്ഞിരപ്പള്ളി, ചെങ്ങന്നൂര്‍, കോട്ടയം ഈസ്റ്റ്, പൊന്‍കുന്നം എന്നീ സ്റ്റേഷനുകളിലും ഉല്ലാസിന് ആറന്മുള സ്റ്റേഷനിലും ക്രിമിനല്‍ കേസുകളുണ്ട്.
