ചാരുംമൂട്: വളർത്തു കുതിരയ്ക്കുനേരേ സാമൂഹ്യവിരുദ്ധ ആക്രമണം. കുതിരയെ കുത്തി പരിക്കേൽപ്പിച്ചു. ചാരുംമൂട് കരിമുളയ്ക്കൽ സ്വദേശി വിജേഷ് കുമാർ വളർത്തുന്ന കുതിരയെയാണ് കുത്തി പരിക്കേൽപ്പിച്ചത്.
പുല്ലു തിന്നുന്നതിനായി കരിമുളയ്ക്കൽ തുരുത്തിയിൽ ജംഗ്ഷനു സമീപമുള്ള പറമ്പിൽ കെട്ടിയിരിക്കുകയായിരുന്നു. കുത്താൻ ഉപയോഗിച്ചെന്നു കരുതുന്ന മദ്യക്കുപ്പിയുടെ ഭാഗങ്ങളും സ്ഥലത്തുനിന്നു കണ്ടുകിട്ടിയിട്ടുണ്ട്.
ചേർത്തലയിൽനിന്നു കുതിരയെ ചികിത്സിക്കുന്ന ഡോക്ടർമാർ എത്തി ചികിത്സ നൽകുകയും മുറിവ് തുന്നിക്കെട്ടുകയും ചെയ്തു. നൂറനാട് പോലീസിൽ പരാതി നൽകി.
