തിരുവനന്തപുരം: വര്‍ക്കലയില്‍ ഹോട്ടല്‍ ഉടമയെ വെട്ടിപ്പരിക്കേല്‍പ്പിച്ചു. വര്‍ക്കല രഘുനാഥപുരം സ്വദേശി നൗഷാദിന് (46) ആണ് പരിക്കേറ്റത്.
തലയ്ക്ക് വെട്ടേറ്റ ഇയാള്‍ വര്‍ക്കലയിലെ സ്വകാര്യ ആശുപത്രിയില്‍ ചികിത്സയിലാണ്. ഇന്ന് പുലര്‍ച്ചെ ഒന്നരയോടെയാണ് സംഭവം.
ചിക്കന്‍കറി കുറഞ്ഞുപോയെന്ന് ആരോപിച്ച് ഉണ്ടായ വാക്കേറ്റം സംഘര്‍ഷത്തില്‍ കലാശിക്കുകയായിരുന്നു. ഇതിനിടെ ഭക്ഷണം കഴിക്കാനെത്തിയ യുവാക്കള്‍ ഹോട്ടല്‍ ഉടമയെ വെട്ടിപ്പരിക്കേല്‍പ്പിച്ചു.
വര്‍ക്കല താന്നിമൂട് സ്വദേശികളായ യുവാക്കളാണ് ആക്രമണത്തിന് പിന്നിലെന്നാണ് നിഗമനം. പ്രതികള്‍ക്കായുള്ള തിരച്ചില്‍ ഊര്‍ജിതമാക്കിയതായി പോലീസ് അറിയിച്ചു.
