യുകെ: ലോട്ടറിലേക്ക് ആളുകളെ ആകർഷിക്കാൻ സമ്മാനത്തുകയായി കോടികളാണു നടത്തിപ്പുകാർ പ്രഖ്യാപിക്കാറുള്ളത്.
സ്പെയിനിലെ ഒരു ചാരിറ്റി സംഘടന നടത്തുന്ന ലോട്ടറിക്കും സമ്മാനം ഒട്ടും കുറച്ചിട്ടില്ല. 31.61 കോടി രൂപ (മൂന്നു മില്യൺ പൗണ്ട്) വിലമതിക്കുന്ന ഒരു ഡ്രീം വില്ലയും 2.63 കോടി രൂപയും (2,50,000 പൗണ്ട്) ആണു സമ്മാനമായി നൽകുന്നത്.
ആയിരം രൂപയാണ് (10 പൗണ്ട്) ടിക്കറ്റ് നിരക്ക്. നറുക്കെടുപ്പില്‍ പങ്കെടുക്കുന്നവരില്‍നിന്ന് ഒരാളെ തെരഞ്ഞെടുക്കും. അയാള്‍ക്കു വില്ലയും പണവും സ്വന്തമാക്കാം.
സ്പെയിനിലെ പ്രമുഖ വിനോദസഞ്ചാരകേന്ദ്രമായ മല്ലോർക്കയിൽ സെറ ഡി ട്രമുന്‍റാന പര്‍വതനിരകള്‍ക്ക് അഭിമുഖമായാണ് ആഡംബര വില്ല ഉള്ളത്. വിശാലമായ ഓപ്പൺ ലിവിംഗ് ഏരിയകളും നാലു കിടപ്പുമുറികളുമുള്ള വില്ലയില്‍ നീന്തല്‍ക്കുളമടക്കമുള്ള സൗകര്യങ്ങളുണ്ട്. വില്ലയ്ക്കു മറ്റു ബാധ്യതകളൊന്നുമില്ല.
ഡിമെൻഷ്യ രോഗത്തിനെതിരേയുള്ള ക്ലിനിക്കൽ റിസര്‍ച്ച് രംഗത്ത് പ്രവര്‍ത്തിക്കുന്ന അൽഷിമേഴ്‌സ് റിസർച്ച് യുകെയ്‌ക്കായി പണം കണ്ടെത്തുന്നതിനാണ് നറുക്കെടുപ്പ്. ഡിസംബർ 15മുതൽ ടിക്കറ്റ് വിൽപന ആരംഭിച്ചു. നറുക്കെടുപ്പില്‍ പങ്കെടുക്കാൻ ഒരു നിബന്ധനയുണ്ട്. യുകെ പൗരന്മാർക്കു മാത്രമെ ടിക്കറ്റ് കിട്ടൂ.
