കൊച്ചി: പ്രേക്ഷകർ ഏറെ പ്രതീക്ഷയോടെ കാത്തിരുന്ന ചിത്രമാണ് അബ്രഹാം ഓസ്‍ലര്‍. യുവതലമുറയിലെ ശ്രദ്ധേയ സംവിധായകന്‍ മിഥുന്‍ മാനുവല്‍ തോമസിന്‍റെ സംവിധാനത്തിൽ പിറന്ന ചിത്രത്തിന് വളരെ മികച്ച പ്രതികരണമാണ് ലഭിച്ചത്. ജയറാമിന്‍റെ ഗംഭീര തിരിച്ചു വരവ് എന്നാണ് ചിത്രം കണ്ടിറങ്ങിയവർ പറഞ്ഞത്.
സൂപ്പർസ്റ്റാർ മമ്മൂട്ടിയുടെ അതിഥി വേഷവും സിനിമയുടെ പകിട്ട് പൊലിപ്പിച്ചു. അണിയറക്കാര്‍ പറയാതെ കാത്തുവച്ച സര്‍പ്രൈസും മമ്മൂട്ടിയുടെ ഈ ഗസ്റ്റ് റോള്‍ ആയിരുന്നു. ജനുവരി 11 നാണ് ചിത്രം തിയറ്ററുകളില്‍ എത്തിയത്. ഏറെക്കാലത്തിന് ശേഷമാണ് ജയറാമും മമ്മൂട്ടിയും ഒരു ചിത്രത്തില്‍ ഒന്നിച്ചെത്തുന്നത്.
ഇപ്പോഴിതാ ചിത്രത്തിന്‍റെ മേക്കിംഗ് വീഡിയോ ആണ് അണിയറ പ്രവർത്തകർ പുറത്തുവിട്ടിരിക്കുന്നത്. ചിത്രത്തിലെ പ്രധാന രംഗങ്ങള്‍ എങ്ങനെ എടുത്തു എന്നതാണ് വീഡിയോയില്‍ കാണിക്കുന്നത്. ജയറാം കാറില്‍ നിന്നും ഇറങ്ങുന്നത് മുതല്‍ മമ്മൂട്ടിയുടെ ഇന്‍ട്രോ വരെ എങ്ങനെ ചിത്രീകരിച്ചെന്ന് വീഡിയോയില്‍ കാണാം.
