കണ്ണൂര്‍: എന്‍ഡിഎ ചെയര്‍മാൻ കെ. സുരേന്ദ്രന്‍ നയിക്കുന്ന “കേരള പദയാത്ര’ 29 ന് കണ്ണൂരില്‍ പര്യടനം നടത്തും. കണ്ണൂർ നഗരത്തിൽ നടക്കുന്ന പൊതുസമ്മേളനത്തിൽ സുരേഷ് ഗോപി പങ്കെടുക്കും.
29 ന് രാവിലെ ഏഴിന് പറശിനിക്കടവ് മുത്തപ്പന്‍ മടപ്പുരയില്‍ കെ. സുരേന്ദ്രന്‍ ദര്‍ശനം നടത്തും. തുടര്‍ന്ന് ഒന്പതിന് തയ്യിലിലുള്ള മത്സ്യത്തൊഴിലാളി കുടുംബാംഗങ്ങളുടെ കൂടെ പ്രഭാതഭക്ഷണം കഴിക്കും.
9.30 ന് പള്ളിക്കുന്നിൽ കേന്ദ്രസര്‍ക്കാരിന്‍റെ വിവിധ പദ്ധതികളിലെ ഗുണഭോക്തൃ സംഗമത്തില്‍ പങ്കെടുക്കും . 12 ന് കണ്ണൂര്‍ ലോക്‌സഭാ മണ്ഡലത്തിലെ മത-സാമുദായിക-സാംസ്‌കാരിക നേതാക്കളുടെ സ്‌നേഹ സംഗമം പരിപാടിയില്‍ അദ്ദേഹം സംസാരിക്കും.
പദയാത്രയുടെ ഭാഗമായി മാധ്യമ പ്രവര്‍ത്തകരോടും അദ്ദേഹം സംവദിക്കും.കള്‍ച്ചറല്‍ പ്രോഗ്രാം ടൗണ്‍ സ്‌ക്വയറില്‍ ഉച്ചയ്ക്ക് രണ്ടിനാരംഭിക്കും. തുടര്‍ന്ന് ഉച്ചകഴിഞ്ഞു മൂന്നിന് കളക്ടറേറ്റ് മൈതാനിയില്‍ പൊതുസമ്മേളനം. പാര്‍ട്ടിയില്‍ പുതുതായി ചേരുന്ന ആയിരത്തോളം പേര്‍ക്ക് ചടങ്ങില്‍ വച്ച് അംഗത്വം നല്‍കും.
പൊതുസമ്മേളനത്തിനു ശേഷം കാല്‍ടെക്‌സ്, താവക്കര, പ്ലാസ ജംഗ്ഷന്‍, റെയില്‍വേ സ്റ്റേഷന്‍ റോഡ്, മുനീശ്വരന്‍ കോവില്‍, പഴയ ബസ്‌ സ്റ്റാന്‍ഡ്, തെക്കി ബസാര്‍ വഴി പദയാത്ര പുതിയതെരുവില്‍ സമാപിക്കും. പദയാത്രയില്‍ കണ്ണൂര്‍ പാര്‍ലമെന്‍റ് മണ്ഡലത്തില്‍ നിന്നുള്ള ആയിരക്കണക്കിനാളുകള്‍ അണിചേരും.
