മുക്കം(കോഴിക്കോട്): തിയറ്റർ രംഗത്തെ പ്രമുഖനും സാംസ്‌കാരിക-സാമൂഹ്യ മേഖലകളിലെ നിറസാന്നിധ്യവുമായിരുന്ന മുക്കം കിഴുക്കാരകാട്ട് കെ.ഒ. ജോസഫ് കിഴക്കരക്കാട്ട് (അഭിലാഷ് കുഞ്ഞേട്ടൻ -73) തൃശൂരിലെ തിയറ്ററിൽനിന്ന് കാൽവഴുതി വീണ് മരിച്ചു. ചൊവ്വാഴ്ച രാത്രി പത്തരയോടെയാണ് അപകടം.
എറണാകുളത്ത് തിയറ്റര്‍ ഉടമകളുടെ യോഗം കഴിഞ്ഞ് സുഹൃത്തുക്കള്‍ക്കൊപ്പം മടങ്ങിയ ജോസഫ് മലപ്പുറം ചങ്ങരംകുളത്ത് സുഹൃത്തിന്‍റെ തിയറ്റര്‍ കെട്ടിടം കാണാനായി ഇറങ്ങിയിരുന്നു. ഇവര്‍ സംസാരിച്ച് കൊണ്ടിരിക്കെ പുറകിലേക്ക് നീങ്ങിയ ജോസഫ് അബദ്ധത്തില്‍ താഴേക്ക് വീഴുകയായിരുന്നു. സുഹൃത്തുക്കള്‍ ചേര്‍ന്ന് ഉടനെ ചങ്ങരംകുളത്തെ സ്വകാര്യ ആശുപത്രിയിലും പിന്നീട് തൃശൂരിലെ സ്വകാര്യ ആശുപത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല.
കോഴിക്കോട് മുക്കത്ത് അഭിലാഷ് തീയറ്റർ സ്ഥാപിച്ചാണ് തിയറ്റർ രംഗത്ത് പ്രവേശിച്ചത്. ഇതുകൂടാതെ കോഴിക്കോട് നഗരത്തിലെ കോറണേഷൻ മൾട്ടിപ്ലക്സ് തിയറ്റർ, റോസ് തീയറ്ററുകൾ എന്നിവയിലായി എട്ടോളം സ്ക്രീനുകൾ കെ.ഒ. ജോസഫിന്‍റെതാണ്. 3ഡി 4കെ, ഡോൾബി അറ്റ്മോസ് സിനിമകൾ പൂർണതയോടെ, ക്ലാരിറ്റി നഷ്ടമില്ലാതെ പ്രേക്ഷകരിലേക്കെത്തിക്കാൻ ജോസഫ് പുലർത്തിയ ശ്രദ്ധ ഏറെ കൈയിടി നേടിയിരുന്നു.
സംസ്കാരം നാളെ ഉച്ചകഴിഞ്ഞ് 2.30 ന് സ്വവസതിയിൽ നിന്നാരംഭിച്ച് കല്ലുരുട്ടി സേക്രഡ് ഹാർട്ട് ചർച്ച് സെമിത്തേരിയിൽ. ഭാര്യ: സിസിലി ജോസഫ് മുണ്ടന്താനം.മക്കൾ: സിജോ ജോസഫ്, സന്ദീപ് ജോസഫ്, ഡോ: സജീഷ് ജോസഫ് ( അഭിലാഷ് ഡെന്‍റൽ കെയർ-മുക്കം). ജസീന ജോസഫ് (അധ്യാപിക, രാജഗിരി കോളജ് -എറണാകുളം). മരുമക്കൾ: ബിജോയ് പോത്തൻ നെടുംപുറം ( സീനിയർ മാനേജർ, ശോഭ ലിമിറ്റഡ് തൃശൂർ) അനീറ്റ ജേക്കബ് കരിപ്പാ പറമ്പിൽ മണ്ണാർക്കാട്,ഡോ: സൗമ്യ മാനുവൽ ചീരാൻ കുഴിയിൽ കണ്ണൂർ.
