വിവിധ സാഹചര്യങ്ങളിലായി 2018 മുതൽ രാജ്യത്തിന് പുറത്ത് മരണപ്പെട്ടത് 403 വിദ്യാർഥികൾ. സ്വാഭാവിക കാരണങ്ങൾ, അപകടങ്ങൾ, ആരോഗ്യ പ്രശ്നങ്ങൾ എന്നിവകൊണ്ടാണ് ഈ മരണങ്ങൾ സംഭവിച്ചതെന്നാണ് കണക്കുകൾ വ്യക്തമാക്കുന്നത്. കാനഡയിലാണ് ഏറ്റവും അധികം വിദ്യാർഥികൾ മരിച്ചത്. ഇക്കാലയളവിൽ 91 ഇന്ത്യൻ വിദ്യാർഥികളാണ് കാനഡയിൽ മരണപ്പെട്ടത്. ഇംഗ്ലണ്ടിൽ മരിച്ചത് 48 ഇന്ത്യൻ വിദ്യാർഥികളാണ്.
403 ഇന്ത്യൻ വിദ്യാർഥികളുടെ മരണങ്ങളാണ് 2018 മുതലുണ്ടായിട്ടുള്ളതെന്ന് വിദേശകാര്യ മന്ത്രാലയത്തിന് ല‍ഭ്യമായിട്ടുള്ള കണക്കുകൾ ചൂണ്ടിക്കാട്ടുന്നു. കേന്ദ്ര സർക്കാരിന്‍റെ പ്രഥമ പരിഗണനയിലുള്ള വിഷയമാണ് വിദേശത്തുള്ള ഇന്ത്യൻ വിദ്യാർഥികളുടെ ക്ഷേമമെന്ന് കേന്ദ്രമന്ത്രി എസ്. ജയശങ്കർ വ്യക്തമാക്കി. വിദേശത്തുള്ള ഇന്ത്യൻ വിദ്യാർഥികളുടെ സുരക്ഷിതത്വം സംബന്ധിച്ച ചോദ്യങ്ങളോട് പ്രതികരിക്കുകയായിരുന്നു മന്ത്രി.
കാനഡയിൽ 91 ഇന്ത്യൻ വിദ്യാർഥികളും, ഇംഗ്ലണ്ടിൽ 48 പേരും, 40 പേർ റഷ്യയിലും 36 പേർ അമേരിക്കയിലും 35 പേർ ഓസ്ട്രേലിയയിലും 21 പേർ യുക്രൈനിലും 20 പേർ ജർമനിയിലുമാണ് മരിച്ചിട്ടുള്ളത്. സൈപ്രസിൽ 14 ഉം ഫിലിപ്പീൻസിലും ഇറ്റലിയിലും 10 പേർ വീതവും ഖത്തറിലും ചൈനയിലും കിർഗിസ്ഥാനിലും 9 പേർ വീതവും ഇന്ത്യൻ വിദ്യാർഥികൾ മരണപ്പെട്ടിട്ടുണ്ട്.
