ചേര്‍ത്തല: കേരള ബാങ്കിലെ പണയസ്വര്‍ണം മോഷണം പോയ സംഭവത്തില്‍ ബാങ്കിന്‍റെ മുന്‍ ഏരിയാ മാനേജര്‍ ചേര്‍ത്തല നഗരസഭ രണ്ടാംവാര്‍ഡില്‍ തോട്ടുങ്കര വീട്ടില്‍ മീരാ മാത്യു (44) അറസ്റ്റില്‍. ഒമ്പതു മാസമായി അറസ്റ്റിനെ അതിജീവിച്ചു കഴിഞ്ഞിരുന്ന ഇവരെ പട്ടണക്കാട് പോലീസാണ് ചൊവ്വാഴ്ച രാവിലെ വീട്ടില്‍ നിന്നു അറസ്റ്റ് ചെയ്തത്.
കേരള ബാങ്കിന്‍റെ ചേര്‍ത്തല, ചേര്‍ത്തല സായാഹ്നശാഖ, പട്ടണക്കാട്, അര്‍ത്തുങ്കല്‍ എന്നിവിടങ്ങളില്‍നിന്നായി 335.08 ഗ്രാം പണയ സ്വര്‍ണം മോഷണം പോയെന്ന പരാതിയിലാണ് അറസ്റ്റ്. ശാഖകളിലെ മാനേജര്‍മാര്‍ നല്‍കിയ പരാതിയിലാണ് ബാങ്കിന്‍റെ ഏരിയാ മാനേജരായിരുന്ന മീരാമാത്യുവിനെ പ്രതിയാക്കി പോലീസ് കേസെടുത്തത്.
ചേര്‍ത്തല സ്റ്റേഷനില്‍ രണ്ടും പട്ടണക്കാട്, അര്‍ത്തുങ്കല്‍ സ്റ്റേഷനുകളില്‍ ഓരോ കേസും വീതമാണ് എടുത്തിരുന്നത്. മോഷണ വിവരം പുറത്തുവന്നതിനെതുടര്‍ന്ന് മീരാ മാത്യുവിനെ കേരള ബാങ്ക് സര്‍വീസില്‍നിന്ന് സസ്പെൻഡ് ചെയ്തിരുന്നു.തുടര്‍ന്നാണ് ശാഖകളില്‍നിന്നു പോലീസില്‍ പരാതി നല്‍കിയത്. തുടര്‍ന്ന് പോലീസ് മൊഴിയെടുത്ത് കേസ് രജിസ്റ്റര്‍ ചെയ്തു.
ചേര്‍ത്തല നടക്കാവ് ശാഖയില്‍നിന്നാണ് ഏറ്റവും കൂടുതല്‍ സ്വര്‍ണം (171.300 ഗ്രാം) നഷ്ടപെട്ടത്.ര്‍ത്തല പ്രധാന ശാഖയില്‍ നിന്ന് 55.480 ഗ്രാമും പട്ടണക്കാട് ശാഖയില്‍നിന്ന് 102.300 ഗ്രാമും അര്‍ത്തുങ്കല്‍ ശാഖയില്‍നിന്ന് ആറുഗ്രാമും പണയസ്വര്‍ണമാണ് മോഷ്ടിക്കപ്പെട്ടത്.
ബാങ്കുകളിലെ പണയസ്വര്‍ണ പരിശോധനയ്ക്കായി ചുമതലപ്പെടുത്തിയിട്ടുള്ള ഏരിയാ മാനേജരായിരുന്നു മീര മാത്യു. ചേര്‍ത്തല കോടതിയില്‍ ഹാജരാക്കിയ ഇവരെ റിമാന്‍ഡ് ചെയ്തു.
