കൊച്ചി: സ്വര്‍ണവില വര്‍ധിച്ചതിനെത്തുടര്‍ന്ന് വില്പനയിൽ കുറവുണ്ടെങ്കിലും ടേണ്‍ഓവറില്‍ കുറവു വന്നിട്ടില്ലെന്ന് ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍.
കേരളത്തില്‍ സ്വര്‍ണത്തിന്‍റെ പ്രതിവര്‍ഷ ഉപയോഗം 220 മുതല്‍ 225 ടണ്‍ വരെയാണ്. ആഗോളതലത്തില്‍ സ്വര്‍ണത്തിന് ഡിമാന്‍ഡ് വര്‍ധിച്ചിട്ടുണ്ടെന്നും ഇന്ത്യയിലും തത്‌സ്ഥിതി തുടരുകയാണെന്നും വേള്‍ഡ് ഗോള്‍ഡ് കൗണ്‍സിലിന്‍റെ ഇന്ത്യ സിഇഒ സച്ചിന് ജെയ്ന്‍ പറഞ്ഞു.
രാജ്യത്ത് 2024ന്‍റെ ആദ്യപാദത്തില്‍ 136.6 ടണ്‍ സ്വര്‍ണത്തിന്‍റെ ഡിമാന്‍ഡ് ഉണ്ടായി. 2023ലെ അതേകാലയളവിലേതിനേക്കാള്‍ എട്ടു ശതമാനം വര്‍ധനയാണിത്. 126.3 ടണ്‍ ആയിരുന്നു 2023ലെ ആദ്യ പാദത്തിലുണ്ടായ ഡിമാന്‍ഡ്.
രാജ്യത്തെ ആകെ ജ്വല്ലറി ഉത്പന്നങ്ങളുടെ ഡിമാന്‍ഡ് 2024ല്‍ ആദ്യ പാദത്തില്‍ നാലു ശതമാനം വര്‍ധിച്ച് 91.9 ടണ്‍ ആയി. പോയവര്‍ഷം സമാനകാലയളവില്‍ ഇത് 91.9 ടണ്‍ ആയിരുന്നുവെന്നും സച്ചിന് പറഞ്ഞു.
രാജ്യത്തെ സ്വര്‍ണ ഉപയോഗം 52,750 കോടിയായും ഉയര്‍ന്നു. 2023ലെ ആദ്യ പാദത്തെ അപേക്ഷിച്ച് 15 ശതമാനമാണ് വര്‍ധന. മുന്‍വര്‍ഷമിത് 45,890 കോടിയായിരുന്നു.
വേള്‍ഡ് ഗോള്‍ഡ് കൗണ്‍സിലിന്‍റെ ഇന്ത്യ സിഇഒ ആയി തെരഞ്ഞെടുത്തശേഷം സച്ചിന് ജെയ്ന്‍ ഇതാദ്യമായിട്ടാണ് കേരളത്തിലെത്തുന്നത്. സച്ചിന് ഇന്നലെ ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍റെ നേതൃത്വത്തില്‍ സ്വീകരണം നല്‍കി.
