ബംഗുളൂരു: നിശാപാർട്ടിയിലെ മയക്കുമരുന്ന് ഉപയോഗവുമായി ബന്ധപ്പെട്ട കേസിൽ തെലുങ്കു നടി ഹേമ അറസ്റ്റിൽ.നടി മയക്കുമരുന്ന് ഉപയോഗിച്ചതായി നേരത്തെ തെളിഞ്ഞിരുന്നു. ക്രൈംബ്രാഞ്ചിന്‍റെ ചോദ്യംചെയ്യലിനു പിന്നാലെയാണ് അറസ്റ്റ്.
നിശാ പാർട്ടിയുമായി ഒരു ബന്ധവും ഇല്ലെന്നായിരുന്നു നടിയുടെ ആദ്യ പ്രതികരണം. മേയ് 19നു രാത്രി ഇലക്ട്രോണിക് സിറ്റിയിലെ ഫാംഹൗസിലാണ് പാർട്ടി നടന്നത്. ക്രൈംബ്രാഞ്ച് സംഘം ഇവിടെനിന്ന് 17 എംഡിഎംഎ ഗുളികകളും കൊക്കെയ്‌നും പിടിച്ചെടുത്തു. അഞ്ചുപേരെ നേരത്തെ അറസ്റ്റ് ചെയ്തിരുന്നു.
പാർട്ടിയിൽ 73 പുരുഷന്മാരും 30 സ്ത്രീകളും പങ്കെടുത്തിരുന്നതായി പറയുന്നു. ഇതിൽ 86 പേർ മയക്കുമരുന്ന് ഉപയോഗിച്ചതായി തെളിഞ്ഞു. തെലുങ്ക് നടൻ ആഷി റോയും പരിപാടിയിൽ പങ്കെടുത്തിരുന്നു.
എന്നാൽ ജന്മദിന പാർട്ടിയാണെന്നാണു കരുതിയതെന്നും അവിടെ എന്താണ് സംഭവിക്കുന്നതെന്ന് അറിയില്ലായിരുന്നെന്നും ആഷി റോയ് പറഞ്ഞു.
