വയനാടിന് കൈത്താങ്ങാകാന്‍ സമ്പാദ്യ കുടുക്ക പൊട്ടിച്ച് നല്‍കി വെള്ളയാംകുടി സെന്‍റ് ജെറോംസ് യുപി സ്‌കൂളിലെ സഹോദരങ്ങളായ വിദ്യാര്‍ഥികള്‍. ആറാം ക്ലാസ് വിദ്യാര്‍ഥികളായ ആരോണ്‍ ടോം ബിനോയിയും ജിയന്ന ട്രീസാ ബിനോയിയുമാണ് തങ്ങളുടെ രണ്ടുവര്‍ഷത്തെ കൊച്ചു സമ്പാദ്യം വയനാടിന് നല്‍കി മാതൃകയായത്.
തങ്ങള്‍ക്ക് ലഭിക്കുന്ന ചില്ലറത്തുട്ടുകള്‍ കുടുക്കയില്‍ സൂക്ഷിക്കുന്ന ശീലം ബാല്യം മുതലേ ഉള്ളവരായിരുന്നു ഈ സഹോദരങ്ങള്‍. ദീര്‍ഘനാളുകളായി സമാഹരിച്ച ഈ തുക ഉപയോഗിച്ച് മധ്യവേനലവധിക്ക് സൈക്കിള്‍ വാങ്ങുന്നതിന് ആഗ്രഹിച്ചിരിക്കുമ്പോഴാണ് വയനാട് ദുരന്തവും നരകയാതനകളുടെ വാര്‍ത്തകളും അറിയുന്നത്.
തുടര്‍ന്ന് തങ്ങളുടെ സമ്പാദ്യം വയനാടിന് നല്‍കുന്നതിന് തീരുമാനിക്കുകയും മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കാന്‍ സ്‌കൂള്‍ ഹെഡ്മാസ്റ്റര്‍ ബിനോയി മഠത്തിലിനെ ഏല്‍പ്പിക്കുകയും ചെയ്തു. വെള്ളയാംകുടി കൊങ്ങിണിപ്പടവ് മുല്ലൂര്‍ ബിനോയിയുടെയും ആഷയുടെയും മക്കളാണ്.
