റാവൽപിണ്ടി: അപമാനമാണു ജീവിതത്തിലെ ഏറ്റവും വലിയ ഇൻവെസ്റ്റ്മെന്‍റ് എന്നു പറഞ്ഞതിനെ അടിവരയിട്ട് ബംഗ്ലാദേശ് ടെസ്റ്റ് ക്രിക്കറ്റ് ടീം. ആഭ്യന്തര കലാപത്തിനിടെയാണ് ബംഗ്ലാദേശ് രണ്ടു മത്സര ടെസ്റ്റ് പരന്പരയ്ക്കായി പാക്കിസ്ഥാനിലെത്തിയത്. ഓഗസ്റ്റ് 21നു നടന്ന ആദ്യ ടെസ്റ്റിന്‍റെ ഒന്നാം ഇന്നിംഗ്സിൽ പാക്കിസ്ഥാൻ 448/6 എന്ന നിലയിൽ ഇന്നിംഗ്സ് ഡിക്ലയർ ചെയ്തു.
ബംഗ്ലാദേശിനെ കൊച്ചാക്കിക്കൊണ്ടുള്ള ഡിക്ലയറായിരുന്നു അത്. തങ്ങൾക്കുനേരേയുണ്ടായ ആ അപമാനത്തിന് ഒന്നാം ഇന്നിംഗ്സ് ലീഡും തുടർന്ന് 10 വിക്കറ്റ് ജയവും നേടി ബംഗ്ല കടുവകൾ കിടു മറുപടി നൽകി.
രണ്ടാം ടെസ്റ്റിലും ജയിച്ച് പരന്പര 2-0നു ബംഗ്ലാദേശ് തൂത്തുവാരിയാണ് അപമാനത്തിനുള്ള മറുപടി പൂർത്തിയാക്കിയത്. ഇന്നലെ അവസാനിച്ച രണ്ടാം ടെസ്റ്റിൽ ആറു വിക്കറ്റിനായിരുന്നു ബംഗ്ലാദേശിന്‍റെ ജയം. സ്കോർ: പാക്കിസ്ഥാൻ 274, 172. ബംഗ്ലാദേശ് 262, 185/4.
ചരിത്ര നേട്ടം
പാക്കിസ്ഥാനെതിരേ ബംഗ്ലാദേശിന്‍റെ ചരിത്രത്തിലെ ആദ്യ ടെസ്റ്റ് പരന്പര ജയമാണിത്. മാത്രമല്ല, പാക് മണ്ണിൽ ബംഗ്ലാദേശ് പരന്പര നേടുന്നതും ഇതാദ്യം. ബംഗ്ലാദേശിന്‍റെ ചരിത്രത്തിലെ മൂന്നാമതു മാത്രം വിദേശ പരന്പര നേട്ടവുമാണിത്.
