കോട്ടയം: അമേരിക്കന്‍ പാര്‍ലമെന്റ് തെരഞ്ഞെടുപ്പില്‍ മത്സരിക്കാന്‍ കോട്ടയം വാഴൂര്‍ സ്വദേശി പീറ്റര്‍ ജേക്കബും. അമേരിക്കന്‍ പാര്‍ലമെന്റിലേക്ക് ന്യൂജേഴ്‌സി ഏഴില്‍ ഡെമോക്രാറ്റിക് സ്ഥാനാര്‍ഥിയായാണ് പീറ്റര്‍ ജേക്കബ് മത്സരിക്കുന്നത്. വാഴൂര്‍ മുല്ലോത്ത് പുതുപ്പറമ്പില്‍ ജേക്കബ് പീറ്റര്‍–ഷീലാ ദമ്പതികളുടെ മകനാണ് പീറ്റര്‍ ജേക്കബ്.
30 വര്‍ഷമായി അമേരിക്കയില്‍ സ്ഥിരതാമസമാക്കിയ കുടുംബമാണ് പീറ്ററിന്റേത്. പീറ്ററിന്റെ പിതാവ് ജേക്കബ് പീറ്ററിന് അമേരിക്കയില്‍ ബിസിനസാണ്. സ്ഥാനാര്‍ഥിയായി മത്സരിക്കുന്ന പീറ്റര്‍ അമേരിക്കയില്‍ വിവിധ മേഖലകളില്‍ സാമൂഹ്യപ്രവര്‍ത്തനം നടത്തിവരു ന്നു. ഡെമോക്രാറ്റിക് പാര്‍ട്ടി നോമിനേറ്റ് ചെയ്തതിനു ശേഷമാണ് പീറ്റര്‍ അമേരിക്കന്‍ പാര്‍ലമെന്റിലേക്ക് മത്സരിക്കുന്നത്.
രണ്ടു വര്‍ഷം കൂടുമ്പോള്‍ പീറ്റര്‍ കേരളത്തില്‍ വരാറുണ്ടെന്ന് ജേക്കബ് പീറ്ററിന്റെ സഹോദരന്‍ ഏലിയാസ് പീറ്റര്‍ പറഞ്ഞു. പീറ്ററിന് ആശംസകള്‍ നേര്‍ന്നുകൊണ്ടു കോട്ടയം–കുമളി റോഡില്‍ പുളിക്കല്‍കവലയില്‍ ഫ്‌ളെക്‌സ് സ്ഥാപിച്ചിട്ടുണ്ട്.
