തെന്നിന്ത്യയില്‍ മാത്രമല്ല ബോളിവുഡിലും നിറയെ അരാധകരുള്ള താരമാണ് തമന്ന ഭാട്ടിയ. താരം അടുത്തിടെ ചെയ്ത ഡാന്‍സ് നമ്പറുകള്‍ വലിയഹിറ്റായിരുന്നു. മുമ്പ് സ്വകാര്യ ജീവിതത്തെക്കുറിച്ച് ഒന്നും സംസാരിക്കാതിരുന്ന തമന്ന ഇപ്പോള്‍ തന്റെ വിശേഷങ്ങള്‍ തുറന്നു പറയാറുണ്ട്.
നടന്‍ വിജയ് വര്‍മയുമായി പ്രണയത്തിലാണ് നടി. ലസ്റ്റ് സ്റ്റോറീസ് എന്ന ആന്തോളജിയില്‍ ഒരുമിച്ച് അഭിനയിക്കവെയാണ് തമന്നയും വിജയ് വര്‍മയും പ്രണയത്തിലാകുന്നത്. മുമ്പൊരിക്കല്‍ തനിക്കൊരാളോട് തോന്നിയ ഇഷ്ടത്തെക്കുറിച്ച് തമന്ന പറഞ്ഞ വാക്കുകളാണിപ്പോള്‍ ശ്രദ്ധ നേടുന്നത്.
ഒരു കൂട്ടുകാരിയുടെ സഹോദരനോടാണ് തമന്നയ്ക്ക് ഇഷ്ടം തോന്നിയത്. ഇയാളെ കാണാന്‍ വേണ്ടി മാത്രം താന്‍ സുഹൃത്തിനടുത്തേക്ക് പോകുമായിരുന്നെന്ന് തമന്ന തുറന്ന് പറഞ്ഞു. അഞ്ചാം ക്ലാസില്‍ പഠിക്കുമ്പോഴാണ് തമന്നയ്ക്ക് ആ ഇഷ്ടം തോന്നിയത്. ഒരുപാട് ദിവസം അവനോട് ആരാധന തോന്നി.
എന്നാല്‍ ഇഷ്ടം തുറന്ന് പറഞ്ഞപ്പോള്‍ തന്നെ നിരാശപ്പെടുത്തിയ പ്രതികരണമാണുണ്ടായതെന്നും തമന്ന ഓര്‍ത്തു. എന്റെ സഹോദരിയുടെ സുഹൃത്താണ് നീ. നീയും എനിക്ക് സഹോദരിയെ പോലെയാണെന്ന് അവന്‍ പറഞ്ഞു. ഈ മറുപടി തന്റെ ഹൃദയം തകര്‍ത്തെന്നും തമന്ന പറഞ്ഞു.
അടുത്തിടെ നല്‍കിയ അഭിമുഖത്തില്‍ തനിക്കുണ്ടായ ബ്രേക്കപ്പുകളെക്കുറിച്ച് തമന്ന തുറന്ന് സംസാരിച്ചിരുന്നു. രണ്ട് ബ്രേക്കപ്പുകളാണ് എനിക്കുണ്ടായത്. വളര്‍ച്ചയ്ക്ക് അത് പ്രധാനമായിരുന്നു. ആദ്യത്തേത് ഞാന്‍ വളരെ ചെറുപ്പമായിരിക്കുമ്പോഴാണ്. എനിക്കിനിയും ഒരുപാട് കാര്യങ്ങള്‍ വേണ്ടതുണ്ടെന്ന് അന്ന് തോന്നി, ഒരു വ്യക്തിക്ക് വേണ്ടി മറ്റ് പല കാര്യങ്ങളും ത്യജിക്കാന്‍ പറ്റുമായിരുന്നില്ല. രണ്ടാമത്തെ ബ്രേക്കപ്പിന് കാരണം ആ വ്യക്തിയുടെ സ്വാധീനം തനിക്ക് നല്ലതല്ലെന്ന് തിരിച്ചറിഞ്ഞത് കൊണ്ടാണെന്നും തമന്ന വ്യക്തമാക്കി.
കരിയറിലെ തുടക്ക കാലത്ത് നോ കിസിംഗ് നിബന്ധന തമന്ന വെച്ചിരുന്നു. ചുംബന രംഗത്തില്‍ അഭിനയിക്കില്ലെന്ന് നടിയുടെ കരാറില്‍ എപ്പോഴും വ്യക്തമാക്കിയിരുന്നു. എന്നാല്‍ അടുത്ത കാലത്ത് ഇതില്‍ മാറ്റം വന്നു. ഇന്റിമേറ്റ് രംഗങ്ങളില്‍ അഭിനയിക്കാന്‍ നടി തയാറായി.
ബാന്ദ്ര എന്ന സിനിമയിലൂടെ മലയാളത്തിലും നടി സാന്നിധ്യം അറിയിച്ചു. ദിലീപായിരുന്നു ചിത്രത്തിലെ നായകന്‍. അരണ്‍മനൈ 3 ആണ് തമന്നയുടെ ഒടുവില്‍ പുറത്തിറങ്ങിയ സിനിമ. സുന്ദര്‍ സി സംവിധാനം ചെയ്ത സിനിമ വന്‍ വിജയം നേടി. സ്ത്രീ 2 എന്ന ബോളിവുഡ് ചിത്രത്തിലെ ഡാന്‍സ് നമ്പറിലൂടെയും തമന്ന പ്രേക്ഷകര്‍ക്ക് മുമ്പിലെത്തിയിരുന്നു.
