കീർത്തി സുരേഷിന്‍റെ ബോളിവുഡ് അരങ്ങേറ്റ ചിത്രം ബേബി ജോണിലെ പുത്തൻ ഗാനം യൂട്യൂബിൽ തരംഗമാകുന്നു. തമൻ ഈണമൊരുക്കിയ ഗാനമാണിത്. ദില്‍ജിത്ത് ദോസഞ്ജും ധീയും ചേർന്നാണ് ഗാനം ആലപിച്ചിരിക്കുന്നത്. ചുരുങ്ങിയ സമയത്തിനകം ശ്രദ്ധ നേടിയ പാട്ട് ട്രെൻഡിംഗിലും ഇടം പിടിച്ചുകഴിഞ്ഞു. മികച്ച പ്രേക്ഷക പ്രതികരണങ്ങളാണു ലഭിക്കുന്നത്.
ഗ്ലാമറസ് ലുക്കിലാണ് കീർത്തി സുരേഷ് ഗാനരംഗത്തിൽ പ്രത്യക്ഷപ്പെടുന്നത്. തെന്നിന്ത്യയിൽ ചെയ്തിട്ടുള്ള സിനിമകളേക്കാൾ ഗ്ലാമറസ് ലുക്കിലാണ് കീർത്തി തന്‍റെ ബോളിവുഡ് അരങ്ങേറ്റ ചിത്രത്തിൽ എത്തിയിരിക്കുന്നത്.
ചിത്രത്തിലെ നായകൻ വരുൺ ധവാനും ഗാനരംഗത്തിൽ ആദ്യാവസാനം നിറഞ്ഞു നിൽക്കുന്നുണ്ട്. ഇരുവരും ഒന്നിച്ചുള്ള നൃത്തരംഗങ്ങൾ ആരാധകരുടെ മനം കവരുന്നു. പാട്ടിന്‍റെ പ്രമോ പുറത്തിറങ്ങിയപ്പോൾത്തന്നെ ഏറെ ശ്രദ്ധിക്കപ്പെട്ടിരുന്നു.
വിജയ്–അറ്റ്‌ലി തമിഴ് ചിത്രം തെരിയുടെ ഹിന്ദി റീമേക്ക് ആണ് ബേബി ജോണ്‍. വാമിഖ ഗബ്ബി, ജാക്കി ഷ്റോഫ്, രാജ്പാൽ യാദവ് തുടങ്ങിയവരും ചിത്രത്തിൽ വേഷമിടുന്നു. കലീസ് ആണ് ചിത്രത്തിന്‍റെ സംവിധായകൻ. ക്രിസ്മസ് റിലീസായി ചിത്രം തിയറ്ററുകളിലെത്തും. വിജയ്കുമാർ എന്ന പൊലീസ് ഉദ്യോഗസ്ഥനായി വിജയ് എത്തിയ തെരി ബോക്സ്ഓഫിസിലും വലിയ വിജയമായിരുന്നു.
