മലയാളം, തമിഴ് പ്രേക്ഷകര്‍ക്ക് ഒരുപോലെ പ്രിയങ്കരിയായ നടിയാണ് അഞ്ജു കുര്യന്‍. 2013-ല്‍ നേരം എന്ന സിനിമയില്‍ നിവിന്‍ പോളിയുടെ സഹോദരിയുടെ വേഷം ചെയ്തുകൊണ്ടായിരുന്നു അഞ്ജു കുര്യന്‍റെ വെള്ളിത്തിരയിലേക്കുള്ള തുടക്കം. തുടര്‍ന്ന് ഓം ശാന്തി ഓശാന, പ്രേമം, ഞാന്‍ പ്രകാശന്‍ , കവി ഉദ്ദേശിച്ചത് , ജാക്ക് ഡാനിയേല്‍ എന്നിവയുള്‍പ്പെടെ പതിനഞ്ചോളം സിനിമകളില്‍ അഭിനയിച്ചു.
സോഷ്യൽ മീഡിയയിലും സജീവമാണ് താരം. സാധാരണ മോഡലിംഗ്, യാത്ര തുടങ്ങിയവയുമായി ബന്ധപ്പെട്ട ചിത്രങ്ങളും വീഡിയോകളുമാണ് അഞ്ജു സോഷ്യൽ മീഡിയയിൽ പങ്കുവെയ്ക്കാറുള്ളത്. എന്നാൽ ഇത്തവണ ഒരു പാചക വീഡിയോയാ‌ണ് താരം പങ്കുവച്ചിരിക്കുന്നത്. സൺഡേ സ്പെഷ്യൽ മീൻ കറിയുമായാണ് അഞ്ജു എത്തിയിരിക്കുന്നത്.
മീൻകറി വെയ്ക്കുന്നതു മാത്രമല്ല, വലയിട്ട് മീന്‍ പിടിക്കുന്നത് മുതല്‍ കറി ഉണ്ടാക്കിക്കഴിയുന്നത് വരെ അഞ്ജു വീഡിയോയിൽ കാണിക്കുന്നുണ്ട്. (വലയിട്ടു മീൻ പിടിക്കുന്നത് ഏതോ ഒരു യുവാവാണ്.) മീൻ വെട്ടി വൃത്തിയാക്കുന്നതും അഞ്ജു തന്നെയാണ്. വിറകടുപ്പ് കൂട്ടി മൺചട്ടിയിലാണ് പാചകം.
നിങ്ങൾക്കും ഔട്ട്‍‍ഡോർ കുക്കിങ്ങ് ഇഷ്ടമാണോ? എന്ന അടിക്കുറിപ്പോടെയാണ് താരം വീഡിയോ പങ്കുവച്ചിരിക്കുന്നത്. സത്യം പറ, ആരാ മീൻകറി വെച്ചത്? എന്നാണ് വീഡിയോയ്ക്കു താഴെ ഒരാളുടെ ചോദ്യം. തീ ഒന്നും ഒരു പ്രശ്നമേ അല്ല… ആ കുക്കിങ്ങ് കണ്ടാൽ തന്നെ മനസിലാകും, അടുക്കളയില്‍ കേറുന്ന ആളാണ്, കണ്ടാൽ തന്നെ അറിയാം സൂപ്പർ ആണെന്ന് എന്നൊക്കെയാണ് കമന്‍റുകൾ. വീഡിയോ കാണാൻ ഇവിടെ ക്ലിക് ചെയ്യുക.
