ഹൊബാര്‍ട്ട്: രണ്ടാം ടെസ്റ്റിലും ദയനീയ തോല്‍വി ഏറ്റുവാങ്ങി ഓസ്‌ട്രേലിയ ടെസ്റ്റ് പരമ്പര ദക്ഷിണാഫ്രിക്കയ്ക്ക് മുന്നില്‍ അടിയറവച്ചു. ഇന്നിംഗ്‌സിനും 80 റണ്‍സിനുമാണ് ലോക ചാമ്പ്യന്‍മാരായ ഓസീസ് തോറ്റത്. രണ്ടാം ഇന്നിംഗ്‌സില്‍ 121/2 എന്ന ഭേദപ്പെട്ട നിലയില്‍ നാലാം ദിനം തുടങ്ങിയ കംഗാരുക്കള്‍ 161 റണ്‍സിന് ഓള്‍ ഔട്ടായി. 40 റണ്‍സ് എടുക്കുന്നതിനിടെ എട്ട് വിക്കറ്റാണ് ഓസീസിന് ഇന്ന് നഷ്ടമായത്. ഉസ്മാന്‍ കവാജ (64), സ്റ്റീവ് സ്മിത്ത് (31), ഡേവിഡ് വാര്‍ണര്‍ (45) എന്നിവര്‍ മാത്രമാണ് രണ്ടക്കം കടന്നത്.
ആറ് വിക്കറ്റ് നേടിയ കെയ്ല്‍ അബോട്ടും നാല് വിക്കറ്റ് നേടിയ കഗീസോ റബാഡയുമാണ് ഓസീസിനെ തൂത്തെറിഞ്ഞത്. ആദ്യ ഇന്നിംഗ്‌സില്‍ മൂന്ന് വിക്കറ്റ് നേടിയ അബോട്ട് മത്സരത്തില്‍ ഒന്‍പത് വിക്കറ്റ് നേട്ടം കൊയ്ത് മാന്‍ ഓഫ് ദ മാച്ച് പുരസ്കാരവും സ്വന്തമാക്കി. പരമ്പരയിലെ മൂന്നാം മത്സരം അഡ്‌ലയ്ഡില്‍ രാത്രിയും പകലുമായി നടക്കും.സ്‌കോര്‍: ഓസ്‌ട്രേലിയ ഒന്നാം ഇന്നിംഗ്‌സ് 85, രണ്ടാം ഇന്നിംഗ്‌സ് 161. ദക്ഷിണാഫ്രിക്ക ഒന്നാം ഇന്നിംഗ്‌സ് 326.
