നെടുമങ്ങാട്: സ്കൂള്‍ വിദ്യാര്‍ഥിനിയെ അപരിചിതരായ രണ്ട് സ്ത്രീകള്‍ ചേര്‍ന്ന് തട്ടിക്കൊണ്ടു പോകാന്‍ ശ്രമം. നെടുമങ്ങാട് കച്ചേരി എല്‍ഐസി ജംഗ്ഷന്‍ റോഡില്‍ ആളൊഴിഞ്ഞ ഭാഗത്തു വച്ചാണ് കഴിഞ്ഞദിവസം രാവിലെ സ്കൂളിലേക്കു പോവുകയായിരുന്ന പെണ്‍കുട്ടിയെ അടച്ചു മൂടിയ വെള്ള ഓട്ടോ ടാക്‌സിയില്‍ വന്ന രണ്ട് സ്ത്രീകള്‍ തടഞ്ഞു നിര്‍ത്തിയത്. വീടെവിടെയെന്നും ആരുടെ മകളാണന്നുമൊക്കെ അന്വേഷിച്ച സ്ത്രീകള്‍ കുട്ടിയുടെ കൈയില്‍ കടന്നു പിടിച്ചതോടെ പെണ്‍കുട്ടി കുതറിമാറി ഈ സമയം ഇവര്‍ കുട്ടിയെ സമീപത്തെ ഓടയിലേക്കു പിടിച്ചുതള്ളി.
ഇവരുടെ കൈയില്‍ കരുതിയിരുന്ന കൈലേസില്‍ എന്തോ സാധനം ഒളിപ്പിച്ച നിലയിലുണ്ടായിരുന്നു. ആ സമയം എതിരെ ഒരാള്‍ നടന്നു വരുന്നതു കണ്ട് സ്ത്രീകള്‍ ഓട്ടോയില്‍ കയറി കടന്നു. വൈകുന്നേരം വീട്ടിലെത്തിയ കുട്ടി പറഞ്ഞ വിവരങ്ങള്‍ രക്ഷകര്‍ത്താവ് നെടുമങ്ങാട് പോലീസിലറിയിച്ചു. പോലീസ് അന്വേഷണം ആരംഭിച്ചു. സമീപത്തെ കടകളിലെ സിസിടിവി ദൃശ്യങ്ങള്‍ പരിശോധിക്കാനുള്ള ശ്രമത്തിലാണ് പോലീസ്.
