കോട്ടയം: മുന്‍ മുഖ്യമന്ത്രി ഉമ്മന്‍ ചാണ്ടിയ്ക്കു നേരെ തെരുവുനായ്ക്കളുടെ ആക്രമണം. കൂട്ടമായെത്തിയ തെരുവുനായ്ക്കള്‍ ഉമ്മന്‍ ചാണ്ടിയുടെ കാര്‍ വഴിയില്‍ തടയുകയായിരുന്നു. കോട്ടയം ടിബി റോഡിലായിരുന്നു സംഘം ചേര്‍ന്നെത്തിയ നായ്ക്കളുടെ വഴിതടയല്‍ സമരം. സംഘത്തില്‍ 25ലധികം നായ്ക്കളുണ്ടായിരുന്നുവെന്നാണ് ദൃക്‌സാക്ഷികള്‍ പറയുന്നത്.
കൊയമ്പത്തൂരില്‍ നിന്നും ചെന്നൈ മെയിലില്‍ വന്നിറങ്ങിയ ഉമ്മന്‍ ചാണ്ടിയെ സ്വീകരിക്കാന്‍ കോണ്‍ഗ്രസ് ്മണ്ഡലം പ്രസിഡന്റ് സിബി ജോണ്‍ കാറുമായെത്തുകയായിരുന്നു. കാര്‍ ടിബി റോഡിലെത്തിയപ്പോഴായിരുന്നു നായ്ക്കള്‍ ആക്രമിക്കാനെത്തിയത്. നായ്ക്കള്‍ കൂട്ടമായി കാറിനു നേരെ പാഞ്ഞടുക്കുകയായിരുന്നു. ഈ സമയം ഉമ്മന്‍ ചാണ്ടി കാറിന്റെ ചില്ലു താഴ്ത്തിവച്ചിരിക്കുകയായിരുന്നു. തുറന്നുവച്ച ചില്ലിലൂടെ തെരുവുനായ കുരച്ചുകൊണ്ട് ഉയര്‍ന്നു ചാടുകയും ചെയ്തു. അതിവേഗം ചില്ല് ഉയര്‍ത്തിയതിനാല്‍ കടിയേല്‍ക്കാതെ ഉമ്മന്‍ചാണ്ടി രക്ഷപ്പെടുകയായിരുന്നു. ഇതിനിടയ്ക്ക രണ്ടു നായ്ക്കള്‍ ബോണറ്റില്‍ കയറിനിന്ന് കുരയ്ക്കുകയും ചെയ്തു.ഒടുവില്‍ തുടരെത്തുടരെ ഹോണ്‍ അടിച്ചതിനെത്തുടര്‍ന്നാണ് നായ്ക്കള്‍ അകന്നു പോയത്. കാര്‍ ടിബിയ്ക്കുള്ളിലേക്ക് കയറിപ്പോയെങ്കിലും നായ്ക്കള്‍ പിന്നാലെയെത്തി. അവസാനം റെസ്റ്റ് ഹൗസിലെ ജീവനക്കാരുടെ കല്ലുപ്രയോഗത്തില്‍ നായകള്‍ പരാജയം സമ്മതിക്കുകയായിരുന്നു.
