മറ്റ് മൃഗങ്ങളില്‍ നിന്ന് വിഭിന്നമായി നായകള്‍ക്ക് ചില പ്രത്യേക കഴിവുകള്‍ ഉണ്ടെന്നാണ് കരുതപ്പെടുന്നത്. അതുകൊണ്ടാണല്ലോ വീട് കാവലിന് പോലും നായകളെ ഉപയോഗിച്ച് വരുന്നത്. മണം പിടിക്കാനുള്ള കഴിവുള്ളത് കൊണ്ട് കേസന്വേഷണങ്ങള്‍ക്കും നായകളെ ഉപയോഗിക്കാറുണ്ടല്ലോ. എന്നാല്‍ ഇതില്‍ നിന്നെല്ലാം വ്യത്യസ്തമായി നായകള്‍ക്ക് അഭിനയിക്കാനുള്ള കഴിവും ഉണ്ടെന്ന് തെളിയിച്ചിരിക്കുകയാണ് മിടുക്കനായ ഈ ഒരു നായ. ഓസ്‌ക്കര്‍ അവാര്‍ഡിന് പോലും പരിഗണിക്കാവുന്ന രീതിയിലുള്ള അഭിനയം കാഴ്ചവച്ച നായയുടെ വീഡിയോയാണ് ഇപ്പോള്‍ തരംഗമായിരിക്കുന്നത്.
വഴിയില്‍ ഒരു പട്ടി ദയനീയമായി ഇഴയുന്ന ദൃശ്യത്തിലൂടെയാണ് വീഡിയോ ആരംഭിക്കുന്നത്. പിന്നിലെ രണ്ടു കാലും അതിന് അനക്കാനാവുന്നില്ല. പിന്നിലെ കാലുകളില്‍ വണ്ടി തട്ടിയോമറ്റോ അപകടം ഉണ്ടായിക്കാണണം എന്ന് കാഴ്ച്ചക്കാരില്‍ തോന്നലുണ്ടാവും. പട്ടിയുടെ ഈ ദയനീയാവസ്ഥ കണ്ട് വാഹനങ്ങള്‍ സ്പീഡ് കുറയ്ക്കുകയും ഇത് മൂലം ട്രാഫിക്ക് ബ്ലോക്ക് ഉണ്ടാവുകയും ചെയ്യുന്നു. തിരക്കുള്ള റോഡില്‍ നിന്ന് നീങ്ങാന്‍ ബുദ്ധിമുട്ടുന്ന നായയുടെ അവസ്ഥ കണ്ട് മനസ്സലിഞ്ഞ ഒരു നല്ല മനുഷ്യന്‍ അതിനെ വാഹനങ്ങളില്‍നിന്നു രക്ഷിക്കാന്‍ ഇറങ്ങി വരുമ്പോഴാണ് ട്വിസ്റ്റ്.
ഒന്നും സംഭവിച്ചിട്ടില്ലെന്ന ഭാവത്തില്‍ പിന്നിലെ രണ്ടുകാലും നിലത്തുകുത്തി പട്ടി ചാടിയെഴുന്നേറ്റ് നടന്നകലുന്നു. പട്ടിയുടെ ഈ അഭിനയം സോഷ്യല്‍ മീഡിയയില്‍ വൈറലായിരിക്കുകയാണ്. ഇത്തവണത്തെ മികച്ച അഭിനയത്തിനുള്ള ഓസ്‌കാര്‍ പുരസ്‌കാരം പട്ടിക്കാണെന്നാണ് വീഡിയോ കണ്ട ഒരു വിരുതന്റെ കമന്റ്. എക്കാലത്തേയും വലിയ പറ്റിക്കല്‍ എന്നാണ് മറ്റൊരാളുടെ കമന്റ്. എന്തായാലും അഭിനയം മനുഷ്യന്റെ മാത്രം കുത്തകയല്ലെന്ന് ഈ ‘ചൈനീസ് പട്ടി’ തെളിയിച്ചു.
https://youtu.be/my54hsBXa6s
