സെഞ്ചൂറിയൻ: ശ്രീലങ്കയ്ക്കെതിരായ അഞ്ചാം ഏകദിനത്തിൽ ദക്ഷിണാഫ്രിക്കയ്ക്ക് വന്പൻ ജയം. ഓപ്പണർമാരായ ക്വിന്‍റണ്‍ ഡികോക്കും ഹാഷിം അംലയും നേടിയ സെഞ്ചുറികളുടെ കരുത്തിൽ 88 റണ്‍സിനാണ് ദക്ഷിണാഫ്രിക്ക വിജയിച്ചത്. ആതിഥേയർ ഉയർത്തിയ 385 റണ്‍സ് ലക്ഷ്യം പിന്തുടർന്ന ലങ്കയ്ക്ക് 296 റണ്‍സ് മാത്രമാണ് നേടാൻ കഴിഞ്ഞത്.
അസീല ഗുണരത്നെ(114) സെഞ്ചുറിയുമായി പൊരുതിനോക്കിയെങ്കിലും സചിത്ര പതിരാന(56) മാത്രമാണ് ലങ്കൻ നിരയിൽ പിന്തുണ നൽകാനുണ്ടായിരുന്നത്. നാലു വിക്കറ്റ് നേടിയ ക്രിസ് മോറിസിന്റെ പ്രകടനമാണ് ലങ്കയുടെ നടുവൊടിച്ചത്. വെയ്ൻ പാർനൽ രണ്ടു വിക്കറ്റ് നേടി. ഇതോടെ അഞ്ചു മത്സര പരന്പര ദക്ഷിണാഫ്രിക്ക 5-0നു സ്വന്തമാക്കി.
നേരത്തെ, ടോസ് നഷ്ടപ്പെട്ട് ബാറ്റ് ചെയ്യാനെത്തിയ ദക്ഷിണാഫ്രിക്ക 50 ഓവറിൽ ആറ് വിക്കറ്റ് നഷ്ടത്തിൽ 384 റണ്‍സ് എടുത്തു. ഓപ്പണർമാരായ ക്വിന്‍റണ്‍ ഡികോക്കും ഹാഷിം അംലയും നേടിയ സെഞ്ചുറികളുടെ കരുത്തിലാണ് ദക്ഷിണാഫ്രിക്ക കൂറ്റൻ സ്കോറിലെത്തിയത്. ഡികോക്ക് 87 പന്തിൽനിന്ന് 109ഉം അംല 134 പന്തിൽനിന്ന് 154ഉം റണ്‍സ് എടുത്തു. ഓപ്പണിംഗ് വിക്കറ്റിൽ ഇരുവരും 187 റണ്‍സ് നേടി. ഡുപ്ലസി 41ഉം ബെഹാർഡിൻ 32ഉം റണ്‍സ് വീതം നേടി.
