ചെന്നൈ: മലയാളി അന്താരാഷ്ട്ര സ്‌ക്വാഷ് താരം ദീപിക പള്ളിക്കലിന് 19.48 ലക്ഷം രൂപ നല്‍കാന്‍ പരസ്യ കമ്പനിയോട് കോടതി ഉത്തരവിട്ടു. ബോര്‍ഗ് എനര്‍ജി ഇന്ത്യ പ്രൈവറ്റ് ലിമിറ്റഡ് എന്ന സ്വകാര്യപരസ്യക്കമ്പനിയ്‌ക്കെതിരേയാണ് വിധി. ജേഴ്‌സിയില്‍ കമ്പനിലോഗോ പതിപ്പിക്കുന്നതിന് കരാര്‍പ്രകാരമുള്ള പണം നല്‍കുന്നതില്‍ വീഴ്ചവരുത്തിയെന്നായിരുന്നു ദീപികയുടെ പരാതി.
2015-16 കാലഘട്ടത്തില്‍ നല്‍കേണ്ടിയിരുന്ന പത്തുലക്ഷം രൂപയും കോടതിച്ചെലവുകളും മറ്റും കണക്കിലെടുത്ത് 19.48 ലക്ഷം രൂപ നല്‍കണമെന്ന ദീപികയുടെ ആവശ്യം കോടതി അംഗീകരിക്കുകയായിരുന്നു. പരാതിയെത്തുടര്‍ന്ന് ഹൈക്കോടതി നിയമിച്ച ആര്‍ബിട്രേറ്ററാണ് നഷ്ടപരിഹാരത്തിന് ശുപാര്‍ശചെയ്തത്. ഈ തുകയ്‌ക്കൊപ്പം 12 ശതമാനം നിരക്കില്‍ പലിശയും നല്‍കണം. പണം മൂന്നു മാസത്തിനകം നല്‍കണമെന്നാണ് കോടതിയുടെ നിര്‍ദ്ദേശം. ക്രിക്കറ്റ് താരം ദിനേശ് കാര്‍ത്തിക്കിന്റെ ഭാര്യയായ ദീപിക സ്‌ക്വാഷില്‍ ലോക 16-ാം റാങ്കുകാരിയാണ്.
