പൂന: ഐപിഎല്ലിൽ ബെൻ സ്റ്റോക്സിന്‍റെ തകര്‍പ്പന്‍ സെഞ്ചുറിയുടെ മികവില്‍ ഗുജറാത്ത് ലയൺസിനെതിരെ പൂന സൂപ്പര്‍ജയന്‍റിന് അഞ്ച് വിക്കറ്റ് വിജയം. ആദ്യം ബാറ്റ് ചെയ്ത ഗുജറാത്ത് 19.5 ഓവറില്‍ 161 റണ്‍സിന് എല്ലാവരും പുറത്തായി. മറുപടി ബാറ്റിംഗിനിറങ്ങിയ പൂന 19.5 ഓവറില്‍ അഞ്ചു വിക്കറ്റ് നഷ്ടത്തിൽ ലക്ഷ്യം കണ്ടു.
63 പന്തിൽ 103 റൺസുമായി പുറത്താകാതെ നിന്ന സ്റ്റോക്സിന്‍റെ തകർപ്പൻ ബാറ്റിംഗാണ് ടീമിനെ വിജയത്തിൽ എത്തിച്ചത്. ഒരു ഘട്ടത്തിൽ നാലിന് 42 റൺസെന്ന നിലയിൽ തകർച്ചയുടെ വക്കിൽ നിൽക്കുകയായിരുന്ന പൂനയെ സ്റ്റോക്സും മഹേന്ദ്രസിംഗ് ധോണിയും(26) ചേർന്നുള്ള കൂട്ടുക്കെട്ടാണ് രക്ഷപ്പെടുത്തിയത്. ഡാനിയല്‍ ക്രിസ്റ്റിന്‍(17) പുറത്താകാതെ നിന്നു. ഗുജറാത്തിന്‍റെ മലയാളി താരം ബേസിൽ തമ്പി നാല് ഓവറിൽ 35 റൺസ് വിട്ടുകൊടുത്തു രണ്ട് വിക്കറ്റ് നേടി.
ടോസ് നേടിയ പൂന ഗുജറാത്തിനെ ബാറ്റിംഗ് അയയ്ക്കുകയായിരുന്നു. ഓപ്പണർമാരായ ബ്രണ്ടൻ മക്കല്ലം(27 പന്തിൽ 45), ഇഷാൻ കിഷൻ(24 പന്തിൽ 31) എന്നിവരുടെ മികവിലാണ് ഗുജറാത്ത് ഭേദപ്പെട്ട സ്കോർ പടുത്തുയർത്തിയത്. പൂനയ്ക്ക് വേണ്ടി ജയദേവ് ഉനാദ്കഡും ഇമ്രാൻ താഹീറും മൂന്നു വിക്കറ്റ് വീതം വീഴ്ത്തി.
